La ar bnai ka la treikam ka jaka pynieng kali hajan Additional, dang bun kiba set surok

Ka jaka ieng kali kaba la ai kyrteng kum ka Multi Level Car Park kaba don hajan ka Additional Secretariat, ka la treikam mynta la kumba ar bnai eiei hynrei dang bun ba sah thylli namar ba briew ki dang sngewtynnad hi ban set ia ki kali harud surok.
Ia kane ka jaka ieng kali ba la mang T. 6.5 klur bad la phiah 8 bynta bad ka lah ban kit ia ka jingkhia haduh 2300 kilo, ka sorkar ka la plie paidbah mynta u snem ha u bnai Rymphang da ka jingthmu ban pynkylluid ia ki lynti iaid ki kali ha surok.
Watla la plie paidbah ia kane ka jaka ieng kali kaba lah ban ngiam haduh kumba 58 tylli ki kali, hynrei ka dang bun ba sah thylli namar ba ki trai kali ki kiar katba lah haba ioh ban pynieng ei ha surok ha lynter ka thain Secretariat.
Ha ka jingiakren bad u nongap ha kane ka jaka ieng kali, ula iathuh ba kumba long mynta kiba wan pynieng kali ki duna bha bad ym ju lah ban pyndap beit baroh namar ba ki kali ki dang ieng ha ki surok ha katei ka thain Secretariat ba dang ioh ei bad ki salia ban wan ha katei ka jaka ba hap siew.
Ha ki sngi bym long trei lei, kiba wan pynieng kali ki duna bha ha katei ka jaka namar ba ka kham jngai na iew na hat bad dei tang ha ki sngi ba long trei ophis ba kham bun ki kali kiba wan pynieng hynrei bun kiba pynieng sha ki surok bad duna kiba wan rung ha katei ka jaka.
Ula iathuh ba ia ki kali kiba wan ieng shi kynta la ju khrong 20 tyngka bad la pynkiew 10 tyngka ha man ka shi kynta ba ki ieng tam.