Mihkhmat ka Ïaikyntiew bad St. Xavier’s kolej sha ka North East NSS Festival

Ki NSS Unit jong ka Iaikyntiew College, Nongthymmai, Shillong bad St. Xavier’s College, Umoid, Mawkyrwat ki la mihkhmat ïa ka jylla Meghalaya ha ka North East NSS Festival 2025, kaba la long naduh ka 10 haduh ka 14 tarik u Rymphang ha Dzüü Resort, Kohima, Nagaland. Ki don 30 ngut ki volunteer NSS ba la shim bynta 15 ngut na kawei ka kolej ryngkat bad ar ngut ki Program ophisar ki la mih na Shillong ha ka 9 tarik Jylliew ban iashim bynta ha tamasa samla ba san sngi ba la pynlong halor ka phang “Viksit Bharat”. Ia ka jingialang la pynlong da ka NSS Cell, ka sorkar Nagaland bad la kyrshan da ka Ministry Youth Affairs & Sports ka sorkar India.

Ha kane ka tamasa la shim bynta palat 300 ngut ki volunteer bad ki ophisar jong ka NSS na ki 8 tylli ki jylla ka thaiñ Shatei Lammihngi, ha kaba la don ka jingïalang halor ka jingstad, ka workshop halor ki nongïalam, ki jingpynikolshor, ki jingïakop bapher bad ka jingleh khuid.Ka kynhun na Meghalaya ka la pyni ia ka jingshad tynrai ha ka tamasa. Ka Iaikyntiew College NSS Unit jong bad ka St. Xavier’s Umoid ki la pyni ruh ia ka riam tynrai Khasi nylla bad ka la pynshongshit da ki jingrwai bad jingtem tynrai. Ha kane ka tamasa ka la mih ka jingsawa ‘Hoi Kiw!’ kaba sngewtynnad, ka kynhun ka la pyni ruh ia ka jingriewspah ka kolshor ka jylla Meghalaya da ka jingkmen bad sngew sarong ia la jong.

U Myntri Rangbah ka Nagaland u Dr. Neiphiu Rio haba la plie ïa ka jingïalang ula ïaroh ïa ka NSS kaba la pynlong ïa ka jingïakynduh ki samla ka thain ban ïasam ïa ka kolshor kum ka rynsan ban pynkhlaiñ ïa ka jingïatylli ha ka thaiñ Shatei Lammihngi. Ïa ka kynhun ki kolej na Jylla Meghalaya la ialam da ka State NSS Cell, ka Directorate Higher & Technical Education, Shillong.