Palat 4 hajar kin iakhun eksam NEET-UG, kyntu u DC ban mih kloi kiba iakhun ha Kendriya Vidyalaya

U Secretary ka Sorkar Jylla uba khmih ia ka tnad Health & Family Welfare u Bah B. Mawlong, hynne ka sngi ula lum jingialang ban khmih bniah ia ki jingpynkhreh na bynta ban pynlong biang ia ka eksamin National Eligibility-cum-Entrance Test (NEET-UG) 2026 ba iaid beit ha kylleng ka jylla Meghalaya.

Ha kane ka jingialang la iashim bynta da u Deputy Secretary ka Ministry Education ka Sorkar India u Dr S. Rajan, Dr R. Marak, Joint Secretary ka Tnad Health & Family Welfare ka Sorkar Jylla bad ki bor pyniaid district bad ki tnad ba dei khmih.

Kiba la pynpaw ka jingskhem jingmut ba ia baroh ki jingdonkam lah dep ban pynbiang ban pynlong eksam NEET-UG 2026 da ka National Testing Agency (NTA) ha ka 21 tarik u Jylliew kan long kaba iaid beit ha kylleng jong ka jylla.

U Bah Mawlong ula bishar bniah ia ka rukom pynkhreh baroh da ki bor pyniaid district bad kiwei kiwei kiba donbynta lang ha ka kam ban pynlong ia kane ka eksamin ha ki jaka thoh eksamin ne Examination Centre bapher bapher bad ula banjur ia ka jingdonkam ban pynthikna ba kane ka eksamin kadei ban long da ka jingsuk jingshngain bad kaba lait na kino kino ki kyrnum kynram bad ula kyntu ia baroh ki tnad kiba dei khmih bad ia ki kynhun ba kin iatrei ryngkat na ka bynta ka bit ka biang jong ki samla kiban ialeh ia kane ka eksamin.

Kin don baroh 14 tylli ki jaka thoh eksamin ne Examination Centre ha kylleng ka jylla ban pynlong ia ka NEET-UG 2026. Na kitei, 10 tylli ki Centre kin don ha Shillong, 2 tylli ha Tura, 1 ha Jowai bad 1 ha North Eastern Police Academy (NEPA) Campus hajan Umiam, Ri-Bhoi district bad kin don 4,164 ngut ban iakhun eksam ha jylla.

Ha kawei pat ka liang, u Deputy Commissioner ka East Khasi Hills ula pyntip sha baroh ki samla ban iakhun ia ka eksamin NEET-UG 2026 ha PM SHRI Kendriya Vidyalaya ha Upper Shillong ba ki dei ban mih kloi na iing ha ka 21 tarik u Jylliew namar ha kane kajuh ka sngi ka Myntri Pla Tyngka ka ri kan leit ban jurip ia katei ka thain bad ka lah ban mih ka jingsah kut kali ha ka thain Upper Shillong.

U DC ula ong, ba ka jingleit jngoh ka heh sorkar ia ka Kendriya Vidyalaya, EAC Headquarters, kan donkam ban pyrkhing ia ka rukom iaid jong ki kali ha ka thain ka ban poi sha Upper Shillong. Kane ka lah ban lam sha ka jingdheng kali bad ka jingslem ha katei ka por ba don ia ka eksamin, kumta ula kyrpad ia ki samla pule ban lait na kino kino ka jingeh ban poi slem sha ka jaka thoh eksamin, la kyntu ia ki ban leit ialeh eksamin sha ka thain Upper Shillong ba ki dei ban mih kloi bad kylluid bha ka por mih na iing bad ruh ban rah ia ki kot ki sla ba donkam ban ioh rung sha ka jaka thoh eksamin.