Phah jingthoh sha u MR ki nongshong dukan ha Iew Khasi ban pynbha na bynta ka jingshngain

Ki longkmie ba die jain ha Iew Khasi lane Khasi Market kaba don hapdeng ka jingpyntrei ha Motphran ki la dorkhas jingkynmaw sha u Myntri Rangbah ka Jylla u Conrad K Sangma ban dawa pynbha mardor ia ka Iew da kaba pynthikna bad shngain shirta katkum ka juk mynta ha ryngkat ki jaka rung jaka mih bad ki kor Ventilation hapoh ka iew.Ïa ka dorkhas la aiti da ka Synjuk ki Nongdie Jain Khasi Market, ka Synjuk ba mihkhmat da 90 ngut ki longkmie Khasi na ki jaka, ki shnong bad ki Constituency bapher bapher jong ka jylla bad ka kane ka dorkhas la soi da ka President ka Kong Shebarnarlene Nongbet bad ka Secretary ka Kong Larisuk Ranee.“Da ka jingburom kaba khraw tam bad ka jingsngewrit ngi aiti ïa kane ka jingthoh jingkynmaw na ka bynta ka jingpyrkhat kaba sbun bad kaba sngewrit jong phi ha kaba ïadei bad ki katto katne ki jingduna kiba kyrkieh hapoh ka Khasi Market kiba donkam ban shimkhia kyrkieh na ka bynta ka jingmyntoi bad ka jingshngaiñ jong ki paidbah, ka koit ka khiah jong ki paidbah, ka jingbha jingmiat jong ki nongdie bad ki nongthied nongpet” la ong ka Dorkhas.Haba batai ba ka Khasi Market kam dei tang ka iew hynrei ne ka jaka khaii pateng, ka Synjuk kala ong “Ka Khasi Market kam dei tang ka jaka khaii pateng, ka dei ruh ka dak jong ka jinglong kyrpang ha ka imlang sahlang, ka kolshor, bad ka jingim tynrai jong ka jaitbynriew Khasi ha kaba kham bun ki longkmie kiba kham noh ka rta ki trei shitom bad kamai jakpoh na kane ka Iew”.

Katkum ka Dorkhas, ki nongdie jingdie ki la treikam la slem bha bad nyngkong daka ba die jingdie ha jingkieng Motphran shwa ban pynkynriah shipor sha ka jaka ieng kali jong ka Pahsyntiew Ri-Bhoi, ha kaba ki dang ïai bteng ban pynïaid ïa ki kam jong ki.Ka Synjuk ka la pynpaw ia ki jingeh kiba jur ha ka jingshngain bad ka koit ka khiah ha ka jaka ba ki shong die jain mynta kaba don ha Stand Bhoi. “Ka jinglong mynta jong ka ïew ka pynlong ïa ka jaka ba don jingma lada khie jumai, ka jingpynkynriah kyrkieh iaki briew, ka jingpynhiar mynsiem kaba heh, bad ka jingkoit jingduna ki kor ventilation kaba khanglad ïa ka jingïaid laitluid jong ka lyer, bad ka buh jingma iaki briew ha ka por ba don ki jingjia ba kyrkieh” ong ka dorkhas.“Ka jingbym don ki jaka rung jaka mih ba kham heh, ki emergency exit bad ki kor Ventilation ka long ka mat kaba pynsngewkhia jur ïa ki paidbah. Ha ka jingjia kaba sngewsih jong lada lynshop ka bor mariang ne ka jingpluh iing, ki jingtei kiba la don lypa ki lah ban ym ai ki lad ki lynti kiba biang na ka bynta ban pynkynriah suk ïa ki spah ne hajar ngut ki nongshong shnong,” ka la bynrap. Ki nongdie jain kila dawa ban don 2 tylli ki jaka rung jaka mih kiba heh, ki Emergency exit bad ki kor ventilation bad ki dawa ruh ban lehkhuid bad pynitynnad iaka Iew. “Ka Iew kam dei satia ban long tang ka pdeng jong ka khaii pateng, ka dei ruh ban long ka jaka kaba ïada ïa ka jingim briew, kaba kyntiew ïa ka koit ka khiah jong ki paidbah, kaba pynneh pynsah ïa ka burom briew, bad kaba ai ïa ka jaka kaba shngaiñ bad kaba pdiang sngewbha ïa uwei pa uwei u nongshong shnong,” kala ong.

Da ka ban jur iaka jingdonkam ban pynbha iaka Iew, kum ka jaka kaba iadei bad ka mariang, kaba lah ban shah ia ki jingjia ba sngewsih, bad kaba pynshong nongrim ha ki briew”, ki nongdie jain ki la kyntu ia ka Sorkar ban kynthup ia ka jingkhuid jingsuba kaba biang, ka jingpyniaid ia ki jaboh jabaiñ, ka bording, ki lad ban iada lada pluh iing bad ki lad ban pynitynnad iaka Iew. “Ngi ngeit da ka jingburom ba hapoh ka jingïalam jong phi, ka jingshimkhia ba khlem artatien jong ka Sorkar na ka bynta ka roi ka par kaba kynthup lang, ka jingbha jingmiat jong ki paidbah, bad ka jingkyntiew ïa ki jaitbynriew trai Jylla kan pynmih ïa ka jingpyrkhat ban shimkhia mardor halor kane ka jingkyrpad jong ngi” ong ki nongdie jain. Ki la bynrap ba da ki spah tylli ki longïing trai ri trai muluk ki shaniah pura ha ka Khasi Market na ka bynta ka kamai kajih jong ki. “Da kaba weng ia kine ki jingeh ban pynbeit iaki jingduna kiba kyrkieh, hapoh ka jingialam jong phi, ka Sorkar kan ym pynbha tang ia ka jingshngain jong ki paidbah bad ka koit ka khiah hynrei kan long ka nuksa ia ka pateng ka ban wan haba iadei bad jingsynshar kaba don ka jingkitkhlieh, ka jingsngewrit, bad ka roi ka par kaba neh na ka bynta ki pateng ban wan,” ong ka dorkhas.