Pynkhreh ka sorkar ban pynitynnad ia ka Assembly barim kum ha Ri Europe

U Symbud Myntri Rangbah ka jylla u bah Sniawbhalang Dhar ula ong ba ka sorkar jylla ka don ia ka jingthmu ban pynitynnad ia ka jaka jong ka Assembly barim ha khyndailad ban long kum kawei na ri nongwei kum ha ri Europe.U bah Sniawbhalang u la ong ba ynda la pynkynriah ia ka Assembly sha Mawdiagdiang, ka sorkar jylla kan pynwandur ban pynbha ia katei ka jaka kaba don ka Assembly barim ha KhyndaiLad, Shillong.

“Hadien ba la rah noh ia ka Assembly sha Mawdiangdiang, ka sorkar kan sa pynitynnad ia ka jaka ba don ka Assembly kaba rim ban long kum kawei na ki ri nongwei”, la ong u bah Sniawbhalang.Ula ong ba watla ia mynta ym pat pynkynriah ia ka Assembly kaba rim namar ba ka dang iaid ka jingshna ha Mawdiangdiang, hynrei la dep ban pynkhreh lypa ia katei ka jaka, kumno ban pynwan dur thymmai.

Katkum ka jingong u Symbud Myntri Rangbah, la khmih lynti ba ka jingpynkynriah ia ka Iing Dorbar ka jylla kaba rim sha kaba thymmai kan urlong ha ka aiom Khristmas mynta u snem u 2025.“Katkum ka dur kaba la pynkhreh ka tnad pynroi sor, la pynkhreh ba katei ka jaka, kan don ka complex ryngkat ki jaka shongkai ki briew bad shibynta pat kan don ka surok kaba ban iaid ki kali bad yn thung dieng ruh sawdong ka ban pynkup ia katei ka jaka da ka dur kaba jyrngam,” ong u Symbud Myntri Rangbah.