Kum shi bynta ban iarap pynmih pisa ia ki nongpang ne ka ‘Poor Patient Fund’ kiba shah sumar ha Dr H. Gordon Hospital, ka Aroha Choir Music Society kan pynlong ia ka tamasa ka put ka tem ha ka 18 bad 19 tarik, Risaw. Haba kren sha ki lad pathai khubor ha Shillong Press Club ka kong Pauline Warjri ka la ong ba ka Society ka la pynbeit ban pynlong ia ka prokram bad ka Robert Hospital na bynta ban iarap pisa ia ki briew kiba shah sumar ha kane ka Hospital.
Ka kong Pauline ka la ong ba ka jingshim jong ka ia kane ka sienjam ka long ban ai burom ia u bah A.H. Scott Lyngdoh (bam kwai ha duwar u Blei) uba dei u kpa jong ka, uba la ju kyntu ia ka ban leh eiei na bynta ban iarap ia kane ka hospital. Halor kane, ka Aroha ka la kwah ban noh synniang lem katba lah sha kiba dei hok da kaba pyllong ia ka jingrwai shi bynta ban pynmih pisa na bynta kane ka jingthmu.
Ka kong Pauline ka la ong ba ka tamasa ka tem ka put kan long ha ka 18 bad ha 19 tarik Naiwieng 2024 ha Soso Tham Auditorium, Shillong naduh ka por 5 baje janmiet. Ha ka 17 tarik Risaw kan don ka Panel Discussion ha Pearly Dew, Jaiaw ha ka 18 tarik kan don ka Medical Camp ka jingai jingsumar ei ha Soso Tham bad 19 tarik kan don ka Concert ha Soso Tham bad ka bai rung kan long 300, 500 bad 1000 tyngka. Na ka liang ka kong Pauline ka la iawer ia ki paidbah ban wan sakhi sha kane ka jingiatem jingrwai na bynta kane ka kam.