Sha u Modi pynher shithi ka VPP halor ka Foreign Contribution Regulation, Act (FCRA), 2026

Ka Voice of the People Party (VPP) ka la pynher da ka shithi sha u Myntri Rangbahduh ka ri u Narendra Modi ban pynpaw ka jingsngewkhia halor ka jingthmu ka sorkar pdeng ban wanrah ka pynkylla ia ka Foreign Contribution Regulation, Act (FCRA), 2026. U President ka VPP u bah Ardent Miller Basaiawmoit ha ka shithi ula ong ba ki don katto katne ki kyndon ba la tyrwa ban wanrah ka jingpynkylla ha ka FCRA Act, 2026, ka la pynsyier ia ka imlang sahlang khamtam ia kito kiba trei ha ki kam ai jingiarap sngewbha bad ki seng trei mon sngewbha.

U bah Ardent ula pynpaw ka jingsngewkhia ba jur halor ka kyndon kaba ailad ia ki sorkar ba kin shimti ban pyniaid ia ki jingdon jingem ki mar mata jong kito ki kynhun kiba la shah pyndam ia ka jingrejistar ha ka FCRA. “Kane ka jingleh ka long ka bym iahap bad ka lah ban pynmih ki jingkylli halor kaba iadei bad ka rukom treikam bad ka jingma ka long ba ka lah ban pyndonkam bakla ia ka bor. Bun ki tnad treikam ki jaka pule khamtam ha ka thain Lammihngi, kynthup ka jylla Meghalaya kidei ba la seng la bun phew snem lyngba ki lynti ba biang katkum ka ain bad kiba la ai ka jingshakri ha ka imlang shalang kum ha ka liang ka pule puthi, ka koit ka khiah bad ka roi ka par. Namarkata ka long kaba donkam ban sngewthuh ba kine ki tnad treikam la pyniaid da ki jaitbynriew ritpaid kynthup ki kynhun khristan, kiba naduh mynshwa ki la iashim bynta kaba khraw ban pynpoi ia ka jingshakri kiba donkam tam sha ki jaka ba kyndong kiba duna ban ioh jingiarap,” ula ong.

Ula bynrap ba ka sorkar pdeng ha shwa ban wanrah ia kino kino ki polisi kiba wanrah ka jingbymshai halor ka jinglong trai bad ka jingpyniaid ia kine ki tnad treikam, ki lah ban thut ia ka jingai jingshakri bad kan ktah ia ka rukom im jong kiba bun ki nongioh myntoi.“ Ngi sngewkhia ba kine ki kyndon, lada pyntreikam khlem ki jingiada kiba biang, ki lah ban wallam ia ki jingeh kiba bun,” ong u bah Ardent. Ula ong ba na ka liang ka VPP ka la kyntu ia ka sorkar ba kadei ban bishar biang ia ki kyndon kiba iadei bad ka jingshimti ia ki jingdon jingem, ban pyntikna ba ka hok longtrai ia ki jingdon jingem, kin ioh ia ka jingiada ba biang bad dei ban wanrah ia ki lad jingiada ba ki jaka trei mon sngewbha bad ki kam ka roi ka par, kin ym don jingktah.