Sngewkhia ka SRS bym biang rukom sam bording bad pyntreikam ïa u Smart Meter

Ki nongialam ka Synjuk ki Rangbah Shnong Ri Bhoi District (SRS), mynta ka sngi ki la pynpaw ia ka jingsngewkhia halor ka jingbym biang ka rukom sam bording bad ka jingpyrshah kaba jur halor ka jingpyntreikam ia u Smart Meter ha ki shnong ki thaw kiba la ktah ia u paidbah namar ka jingrem dor ka bai bording ilektrik.

Ia kane ka sur la pynpaw, da ka SRS ha ka jingialang jong ka Executive Committee kaba la long mynta ka sngi ha Saiden, ha kaba la iatai ia bun tylli ki mat kiba donkam bad ki jingeh jong ki Shnong ki thaw khamtam ki nongshong shnong ka district.

Ha kane ka Executive Committee, la shimbynta da ki nongialam ba kynthup ka u Bah BB Makdoh, President, u Bah PB Shilliang General Secretary, kiwei kiwei ki nongkitkam nalor ki Rangbah Shnong na ki Shnong bapher bapher ka Ri Bhoi District.

Na ka liang u Bah PB Shilliang, u la kren ha kaba ia dei bad ka mat jong ka jingpyntreikam ka sorkar jylla ia u Smart Meter ha kaba ia dei bad ka jingsam bording ilektrik, ha kaba ia kane ka mat na ka liang ka Synjuk na ka por ka la dep ban ia kynduh ia u Myntri ka Tnad Sam Bording ha ki snem ba dang bat da u Bah AT Mondal ban pynpaw ia ka jingeh jong u paidbah halor ka jingbym biang janhirding ilektrik bad ka jingkiew dor kaba la palat liam ha kaba ka bai bording ka poi haduh 30-40 hajar ha ka shibnai kane ka ktah ia u duk u suk.

U la ong ruh, ba ka jingpyntreikam ia u Smart meter ka dei tang ka jingai contract ia ki riewshimet, ha kaba u contractor u kwah ban pyndep kham kloi ia ka kam ban ioh noh ia ka bill, na ka liang ka Synjuk horkit hordang kan nym ailad bad la bthah ia ki bor ka tnad sam bording ban weng noh ia ki smart meter kiba la pyndait ha ki shnong ki thaw hapoh ka shibnai lym kumta ka Synjuk kan ai bor ia ki Dorbar Shnong ban weng hi bad ka tnad sam bording ka dei ban shim jingkitkhlieh.

Shuh shuh ruh, la ong ba lada ka tnad MeCEL ka dang iaid lait na kaei ba la dep ban ia kren pynbeit lyngba ki jingialang ba la long ha Umiam halor ki smart meter, na ka liang ka Synjuk kam banse ban khang ia ka ophis treikam jong kaba don ha Umiam.