Ka ktien Khasi ka la ioh rung ha Khyrnit baphra, lada ki nongialam kim ioh thiah kat bym pat dep kam: KAS

U President ka Khasi Authors’ Society (KAS), Dr. DRL Nonglait ha ka Sngi Palei u la ther tyngeh ia ki nongthaw ain Khasi bad kumjuh ia ki sorkar jylla ba leit noh da kaba ong ba ‘lada ki nongialam jong ngi ki don ia ka mynsiem ban ym thiah ym dem kat bym pat dep ka kam, ka Ktien Khasi kan jin da la ioh rung ha ka Khyrnit ba Phra’.

U Dr. Nonglait u la kren ia kane ha ka jingialang paitbah kaba la long ha Iew Mawkyrwat, South West Khasi Hills District ha kaba la iashimbynta lang da baroh ki kynhun sengbhalang napoh ka District, ki samla pule bad ki riew paidbah napoh ka District ha ryngkat ki placard kiba dawa ban ithuh noh ia ka ktien Khasi.

U Dr. Nonglait u la kynthoh ruh ia ki nongthaw ain halor ka jingbym kitkhlieh ha kaba ka KAS ka hap ban pynkynmaw biang ia ki na ka por sha ka por halor ka jingithuh ia ka ktien Khasi watla ha ka jingshisha kadei ka kamram jong ki ban pynurlong ia kata. U la kynthoh ruh ïa ki sorkar jylla kiba la leit noh namar ka ‘jingklet jong ki ïa ka jingkitkhlieh’ kaba la pynbor ïa ka KAS ban mih sha surok bad pynkynmaw biang ïa kane ka mat.

U President ka KAS u pynkynmaw biang ïa ka jingdawa jong ka seng ban pynlong ktien sorkar ba pura ia ka ktien Khasi hapoh u bnai Iaiong, 2026. “Ngi la rai ban ïakren bad ka sorkar, hynrei ka nongrim jong ngi ka long kaba skhem, kata, ba ka jingpynlong ïa ka ktien Khasi kum ka ktien sorkar ba pura ka dei ka kam bad ka sobjek jong ka jylla kaba phim (sorkar jylla) donkam ban pan jingbit napoh Delhi,” ong u Dr. Nonglait.

Kiwei pat kiba la ai jingkren ki kynthup ïa u Dr. K.D. Ramsiej, Vice President ka KAS, u Bah P. Wanniang Assistant Secretary ka KAS Mawkyrwat Unit bad ki nongialam jong ki sengbhalang bapher bapher napoh ka District.