Ka Nongsohpian ka shnong barit sha kyrdan baheh ban sam um lyngba ka JJM

Kum shibynta ban niew burom halor ka jinglah jong ka shnong Nongsohpian ban pyntreikam bha ia ka scheme umbam umdih hapoh ka shnong, ka tnad PHE ka sorkar jylla lyngba ka ophis jong u Chief Engineer, ka la pynlong ïa ka Jal Gaurav Samman 2026 ha West Khasi Hills district hapoh ka Jal Jeevan Mission. Kane ka prokram ka pyni ïa ki nuksa ba jop bad ki rukom treikam kiba seisoh ha ka jingïada bad ka jingpynïaid ia ka scheme umbam kaba la leh da ki shnong hi.

Ha kane ka sngi, ka tnat ka la pynkup burom kyrpang ïa ka shnong Nongsohpian kaba la ïoh ïa ka khusnam Jal Mahotsav Award 2026 na ka President ka ri India mynta u snem. Ka shnong Tiehsaw Khyllem ruh ka la ioh ia kane kajuh ka Award bad la dep ban leh burom dang shen. Ha kajuh ka por, hynniew tylli kiwei pat ki shnong kata ka Mawlangkhar, Domkohsam, Nongspung, Umsaw, Tyllang, Selleiiawkhlein bad ka Nongsohpian ki la shah pynkup burom ha ka District namar ka jinglah jong ki ban pyntreikam bha ïa ka umbam ha ki shnong jong ki.

Nalor kata, la pynkup burom ruh ia i kong Phuldaris Wahlang namar ka jingnoh synniang kaba kordor ha ka jingïada ia ki tyllong umbam umdih, katba u nongtrei muster roll, u Rockystar Syiem u la ioh ia ka jingithuh ba kyrpang namar ka jingtrei shitom jong u ban pynthikna ïa ka jingsam umbam kaba biang sha ki paidbah shnong.

Haba kren ha kane ka jingïalang, u Chief Engineer jong ka Public Health Engineering (PHE) Department, u R.S. Nongbri, u la ban jur halor ka jingdonkam jong ka umbam kum ka bynta kaba kongsan eh ha ka jingim u briew bad ki kynja ba im.

U la maham ba lada ym shimkhia ban pynneh ïa ki tyllong umbam mynta, ka pateng ban wan kan sa mad jingeh namar ka jingduna umbam. U la kyntu ïa ki paidbah ban ai ka jingïatreilang ha ka ban pynneh pynsah ia ki um ki wah bad u la ong ruh ba ka jingjop jong kine ki shnong kan long kum ka nuksa ïa kiwei pat.

Ha katei ka sngi la pynlong ruh ïa ka jingbamsmai da baroh kiba wan ïashim bynta, kum ka dak jong ka jingaiti ban pynneh ïa ki tyllong umbam umdih. Hadien ka jingialang la ioh ban plie paidbah ruh ia ka top um jong katei ka shnong da u CE u Bah RS Nongbri.

Ha kane ka prokram la ïadon byntalang da ki heh ophisar kynthup ïa u Additional Chief Engineer,Zone-3 u Kelinson Khonglah , u Superintending Engineers PHE Monitoring Cell, u D. Shabong, u L.O. Dhar, SE PHE, WKH, u Executive Engineer, PHE Nongstoin, u Teilang Kharrubon, ki nongtrei jong ka PHE Nongstoiñ, bad ki paidbah shnong, lem bad kiwei pat.