Ka Biennial General Assembly PCI ha Balang Presbyterian Phudmuri

:Ka General Assembly Presbyterian Church of India ka la pyntip ba ka Balang Presbyterian phudmuri kaba hap ha KJP Synod Sepngi, kan pdiang ia ka jingialang jong ka 46th Biennial General Assembly kaba dei ruh ka jingrakhe ia ka jingdap 100 snem ka PCI ka ban sdang naduh ka 29 tarik Iaiong haduh 3 tarik Jymmang, 2026.

Haba kren sha ki lad pathai khubor u Sr. Administrative Secretary u Rev.BR. kharnaior ryngkat ka jingdonlang lang ki Tymmen Basan, ki nongkitkam ka Balang, ula pyntip ba ia ka jingiaseng yn sdang naduh ka miet jong ka 28 tarik Iaiong ha ka por 7 baje ha ka Balang Mawlai Phudmuri Presbyterian bad yn pynkut ia ka jingiaseng ha ka 3 tarik Jymmang kaban long ha madan JN Complex.

U Rev. Kharnaior ula pyntip ruh ba ha ka 2 tarik Jymmang kan don ka jingiaseng ban rakhe ia ka jingdap 100 snem jong ka PCI kaban long ha madan Heh, Mawlai bad ha kane ka sngi yn pyllait paidbah ruh ia ka Sovenir bad kin don ruh ki jingai ba kyrpang ia kiba la noh synniang ia ka balang Presbyterian ha ri India.

Katkum ka jingiathuh u Rev, Kharnaior, kin don haduh 2500 ngut ki Delegate na ki 12 tylli ki Synod kiba kynthup ka Mizoram Synod, Cachar Hill Tribe Synod, Manipur Synod, Ri Bhoi Presbyterian Synod , KJP Mihngi Synod bad KJP Sepngi, Tripura, Karbi Anglong Presbyterian Synod bad ka Syndon pdeng.

Ula pynpaw ka jingkhmih lynti ba baroh ki riewngeit na kylleng ka jaka kin ia wan ban don ryngkat ha kane ka jingiaseng.