Ka iew ban die jingri ia ki nongrep, ban weng khot Tender ia ki Vendor ha ka MGNREGS

Ka Synjuk Ki Rangbah Shnong, Ri Bhoi District hynne ka sngi Baar ka la leit iakynduh bad ai dorkhas ha u Myntri Rangbah ka Jylla u Conrad K Sangma ban pynsngew ia ki jingeh ki nongshong shnong ka Ri Bhoi District.

Ia kane ka kynhun la ialam da u Chairman u BB Makdoh ryngkat bad u Secretary u Bah PB Sylliang bad ai ka dorkhas ha u Conrad Sangma bad kyrpad ban tuklar lem halor ka jingdonkam ban don ia ki polisi treikam bad ia ki jingshimkhia na ki bor ba dei khmih.

Ka synjuk ka kyrpad ban weng noh ka jingkhot Tender na bynta ki Vendor hapoh jong ka MGNREGS bad ban pynthikna ba kan don ka jingtrei ba khuid bad pynneh ia ka bor treikam ki Dorbar Shnong bad ka la kyntu dei ban jied ia ki Vendor bad dei ban pynneh ha ki Village Employment Councils (VEC) hapoh ka jingbtin ka jong ki.

Nalor kane ka jingpyntreikam ia ka Jal Jeevan Mission (JJM) scheme ka la pynpaw, ha kiba bun tylli ki shnong kam shim la long kaba biang ha kaba ka la don ka jingsam bad ka jingpyndait ia ki pipe um hynrei kim shym ioh umbam umdih bad ka la kyntu ia ka sorkar ban ithuh bad ban leh ia ki kam pynroi na ka bynta ban pynneh ia ki tyllong um ha kitei ki shnong khnang ba katei ka schem kan lah ban ai ka jingshakri kumba la thmu.

Ka Synjuk ka la pynpaw ruh ha kaba ia dei bad ka kam ri sniang ha kaba ki nongrep ki la mad jingeh, namar ka jingbym tehlakam ia ka jingkhaii ia ki sniang kiba la shu wanrah na shabar ka jylla bad ka la dawa ba dei ban don ia ka Check Point ban pyrkhing ia ka jingwanrah ia kine ki sniang kiba nabar bad ban buh noh ruh ia ka iew ba kyrpang na ka bynta ki nongrep ka jylla ba kin die ia ki jingri ki jong ki.

Ha kaba ia dei bad ka jingduna ha ka jingioh ia ka bor ding elektrik, ka Synjuk ka la kyrpad ia u Myntri Rangbah ban shimkhia halor ka jingbym biang ka bording elektrik ha Ri Bhoi khamtam haba ka la don ka jinglip ka bording kaba 2 haduh 3 sngi.

Ka la pynpaw ruh khnang ba kan don ka jingiatreilang hapdeng ki bor sorkar bad ki khlieh nongsynshar ha kylleng jong ka district, ka la kyrpad ban bhah tyngka na ka bynta ban tei ia ka ophis treikam jong ka Synjuk Ki Rangbah Shnong.

Ha kane ka jingiakynduh ka SRS Ri Bhoi ia u Myntri Rangbah ka jylla, la iadonlang ruh u Symbud Myntri Rangbah u Bah Prestone Tynsong bad u Myntri Sorkar u Bah Sosthenes Sohtun.