Byrngem ka JAC ban pynjur jingiakhih, dawa khang syndon ia ki ‘Bulker Truck’ Star Cement bad Dalmia Cement

Ka Joint Action Committee ba kynthup ia ka East Jaintia Hills Truck Owner and Transporter Association bad ka Jaintia Hills Truck Owners’ Association ka la bteng bad pynjur shuh shuh ia ka jingiakhih ba khlem pud bad pynphai noh ia ki bulker truck jong baroh ki company cement, ka East Jaintia Hill bad kiwei ki trok nalor ki bulker ka Star Cement bad Dalmia Cement.

Kum ban shu pynkynmaw ka JAC ka la sdang ia katei ka jingiakhih da kaba bat bad pynphai noh shwa tang ia ki bulker truck kit cement jong kitei ki kompany ka sdang naduh 14 tarik mynta u bnai ha Tuber Tahkhniang, East Jaintia Hills. Hynrei naduh ka 24 tarik mynta u bnai kan pynjur shuh ka jingiakhih da ban pynphai sa ia ki trok kit cement bad clinker jong ka Star Cement bad Dalmia Cement.

Ka daw ba pynlong ia ka JAC ban shim ia kane sien jam, ka long halor ar tylli ki nongrim kaba nynkong ka long ka jingdawa na kitei ki company cement ban pyndam noh shisyndon ia kitei ki bulker truck, namar kitei ki truck ba kit bad leit buh cement sha kylleng ki jaka ha Ri Khasi-Jaiñtia bad shabar jylla ka la ktah shi katdei ia ka kamai kajih ki trai trok ba dei ki trai ri ha kitei ki company.

Kaba ar ka long ka jingdawa ban pyntreikam hok ia kaei ba la ia pynbeit bad ka Star Cement lem bad ka Dalmia Cement ban ai trip mar 9 trip shisngi ia kawei ka seng bad kiwei. Hynrei kumba long mynta kitei ki company ki la ai trip tang 3 haduh 6 trok kawei ka seng nalor ka pynap slem 4 haduh 9 sngi ban ioh thep bad pynhap mar.

Kane ka ktah ia ka jingioh trip ki truck trai ri trai muluk. Da kane ka buit sianti kitei ki company, ka JAC ka la duh noh jan mar shiteng ka bhah jingioh trip ha kitei ki company.

“Da katei ka jingleh khliehshrieh jong ki company cement, kawei ka truck kan ioh trip tang 2-3 trip ha ka shibnai. Tang da kane ngin siew ram sha bank, ne ngin siew tulop driver ne ngin thied khaw lane ngin phah skul khun” ong ka JAC.

“Ha ka jingshisha kawei na ki mat ba ha khmat ba wanrah ia kitei ki cement company ba heh shapoh ka ri ka muluk jong ngi, ka long na ka bynta ka ioh kam ioh jam (Direct bad indirect employment) ki trai ri trai muluk, hynrei kam shym long kymta, namar ba bun ki kam ki jam hapoh kitei ki company ki trei kiba nabar” la bynrap ka kyrwoh.

“Kumta halor kitei ki jingdawa, lada jia ba kitei ki cement company kim patiaw, ka JAC kan sa pynjur ia ka jingiakhih nangne sha khmat bad lada jia eiei kaba sngewsih kitei ki company kin hap ban shim ia ka jingkitkhlieh,” la ban biang ka JAC.

“Kane ka jingiakhih ka dei ka kam iap kam im jong ngi, kum ki trai ri trai muluk. Kumta ngi kyrpad ia baroh ki dkhot ka JAC ba ia tylli ha kajuh ka nongrim ha kane jingiakhih. Ka kyrpad ia kiwei pat ki kynhun seng bhalang, khamtam kiba treikam hapoh Ri Lum Jaiñtia ba kin sngewbha ban ai ia ka jingkyrshan lem halor kane ka jingiakhih, khnang ki trai ri trai muluk kin ioh ia ka hok bad kin ym shah leh beiñ ha ki cement company” la pynkut ka kyrwoh ba la phah da u Deolangki Dkhar Asstt. Secretary JAC.