Pynkup bor ia kiba dang bat niam tynrai ha ka lehniam ka Raid Mylliem

Ki khun ki hajar ka Raid Mylliem jong ka Hima Mylliem hynne ka sngi ki la kyntu ia ka Khasi Hills Aitonomous District Council (KHADC) ba ka dei ban pynkup bor ha kiba dang bat tynrai ha ka niam Khasi ban pyndep ia ka niam ka rukom jong ka Raid Mylliem.

Ki khun ki hajar ka Raid Mylliem kynthup ki rangbah, ki samla, kynthei bad shynrang hynne ka sngi ha ka jingiakynduh ia u Executive Member ka KHADC u bah Denzil Reynard Chen ki la kyrpad ban bynshet ia ka jingleh niam leh rukom jong ka Raid Mylliem ha ki khun ki hajar kiba dang bat ia ka niam Khasi tynrai.

Haba kren sha ki lad pathai khubor u bah Justing Kharkongor ryngkat u bah Marko Synteng Umwi bad ka kong Phrenti Synteng Nongdhar, ki la ong ba mynshem snem ki la ioh ban pyndep ia ka jinglehiam ka Raid Mylliem bad mynta u snem ruh ki la kyrpad ba kin pyndep biang ma ki ia ka niam ka rukom namar kane ka dei ka hok bad ka bynta jong ki Khun hajar uba dang bat ia ka niam tynrai.

Halor kane, na ka liang u EM ula kular ban bishar bniah ia kane ka jingkyrpad jong ki khun ki hajar bad un ai ka jingiatreilang halor kane ka bynta.

Katkum ka jingiathuh kine ki riew rangbah, ka jingleh niam ha u Mawnarian bad ha u Lum Shyllong ka ju long ha u bnai Jymmang bad hadien ba la dep nangtei, ki sa wan ban pyndep ia ka niam sa ha Iewduh.

Ki la iathuh ruh ba ha Mawnarian, Lum Shyllong ka ju dei ka rukom ba shisien ba la shad ar sien, dei ban pyndep baroh lai sien kynthih bad kim lah ban ia poi kha kat bym pat dep ban shim bynta ha ka shad baroh lai sien namar ba ka iaid katkum ka niam ka rukom.

“Ngi kiba ksoh ia la ka tynrai ngi ieng ha la ka nongrim bad ngim kwah ban wanrah ka jinglehniam da kiwei kiba la don sha kawei ka jingngeit,” ki la ong.