Ka thain lammihngi ka la kiew 6.41 lak ton ka jingpynmih dohkha hynrei ka dang duna anchor

Ban pynkhlaiñ ïa ki kam ri dohkha ban pynbiang ïa ka jingdonkam dohkha ki jylla ka thaiñ Shatei Lammihngi, ka Aquaex India ryngkat ka jingïatreilang bad ka National Fisheries Development Board (NFDB) ka sorkar India lem bad ka jingkyrshan ka Progressive Farmer Trust ka pynshai halor ka Aquaex Northeast 2026 Regional Fisheries bad Aquaculture Expo bad Seminar ka ban wan ban kyntiew ia ka jingpynmih dohkha bad ban pyniaid iew.

Ha ba kren sha ki lad pathai khubor ha Shillong Press Club u Rajnish Kumar ula ong, ka thaiñ shatei lammihngi ka la pynkhreh ban wanrah ka jingkylla ha ka kam ri dohkha bad ïa ka Aquaex Northeast 2026 la pynbeit ban pynlong ha ka 12 bad 13 tarik u Jylliew, 2026 ha Maniram Dewan Trade Centre, Guwahati.

Ula ong ha ka sien nyngkong ha ka thaiñ kan pynïasoh ïa baroh ki kam ba ia dei bad ka jingri dohkha hapoh kawei ka rynsan, naduh ki nongrep bad ki jaka ri dohkha haduh ki nongpynbiang ïa ka teknoloji, ki nongpynkhreh, ki nong bei tyngka bad ki nongthaw polisi.

Ula ban jur watla ka India kam dei kaba duna bam, hynrei ka ri ka ïakynduh ïa ka jingduna ha ka protein, kaba pynlong ïa ka kam ri dohkha kum ka bynta kaba kongsan na ka bynta ka jingpynbiang ïa ka jingbam ba tei bad ka jingpynmih ïa ki lad kamai kajih. Ha kane ka expo yn don ki jingïalang, ki jingpyni ïa ka teknoloji bad ki jingïamir jingmut ban ïarap ïa ki nongrep ban shim ïa ki rukom treikam katkum ka juk mynta bad ban kyntiew ïa ka jingmih.

U la pyntip ka jingpynmih dohkha ha ka thaiñ Shatei Lammihngi jong ka Ri India ka la kiew bha na ka 4.03 lak ton ha u snem 2014-15 sha ka 6.41 lak ton ha u snem 2023-24. Wat hapdeng kane ka jingkiew, ka thain ka dang ïai bteng ban ïakynduh ïa ka jingduna, kaba donkam ïa ka jingwan rah mar nabar kaba haduh 43,000 haduh 90,000 ton man la u snem, khamtam namar palat 90–95 percent na ki nongshong shnong ki dei kiba bam dohkha. Ha Meghalaya, ka jingpynmih dohkha mynta ka long haduh kumba 20,000 metric ton ka don ka jingdawa kaba long 32,000 metric ton, kaba pynlong ia ka jingduna kumba 12,000 metric ton.

Haba ai jingkren ha kane ka sngi, u AnupSarmah u la ong ba kane ka jingïalang kan pynlong ïa ka jingïakynduh jong ki nongthied bad ki nongdie, ki jingïakren hapdeng ki nongbei tyngka, bad ka jingïakren hapdeng ki nongrep bad ki stadsaian bad kito kiba don ha kane ka kam, kaba plie lad ïa ka jingïasam jingtip bad ka jingïadei ha ki ïew ki hat. U la bynrap ba ki nongridohkha ba pawkhmat bad ki riewshemphangna kylleng ka ri kin ïasamïa ki jingshem jong ki, katba ka jingpynleit jingmut kyrpang kan long ha kaba pynïasohïa ki nongrep bad ki nongthied, kynthup ïa kito kiba don ha ki bynta ba kyrpang kum ka jingridohkha rainbow trout. U la ban jur ba lyngba kane ka rynsan, yn pynsaphriangia ki jingtip sha ki nongridohkha bad ki nongseng kam lajong kiba kwah ban kyntiew ia ka kam ri dohkha kum ka lad kamai, kaba plie lad ia ki ban phaikhmat sha kane ka kam kum ka lad kamai kaba iaineh bad kaba iohnong.

Haba ai ka jingkren, u Ashim Kumar Borah u la bataiia ka kam ri dohkha kum ka “ka kam ba thymmai” ha ka thain shateilammihngi, kaba sakhi ia ka jingkiew kaba man la u snem kaba long kumba 10 percent. U la ban jur ba la pyntreikam ia katto katne ki sienjam ba iadei bad ka bha ka miat bad ka roi ka par ha kylleng ki bynta shwa ban lum, ha ka por ba lum bad hadien ka por ba lum, kynthup ïa ki jingbei tyngka ha ka jingpynïaidïew ia ki dohkha ha ka rukom kaba khuid bad ki jingdon jingem.

U la ong ruh ba ka jingbei tyngka kaba kongsan haduh kumba T.2,500 klur la pynlut ha kine ki snem ba la dep hapoh ka PradhanMantriMatsyaSampadaYojana(PM-MSY) ban pynkhlain ia kane ka kam. U la ban jur ba ki rynsan kum ka Aquaex ki ai ki lad kiba kordor ia ki nongrep ban iakren bad ki riewshemphang, ban ioh jinghikai na ki khana jong ka jingjop, bad ban shim ia ki lad ki lynti kiba thymmai wat hapdeng ki jingeh kum ka jingduna ki jingdon jingem.

Ki nongpynïaid ki la ban jur ba ka National Fisheries Development Board, kum ka apex body hapoh ka Tnad Fisheries, Sorkar India, bad ka tnad pyntreikam ïa ka PM-MSY ka don ka bynta kaba kongsan ban pynïaidshakhmatïa ka Blue Revolution ha ka ri. Ka Aquaex India ka la pynpaw ïa ka burom ban ïohïa ka NFDB kum ka nongïarap ban pyniaid kam na ka bynta ka Northeast edition.

Ka Aquaex Northeast 2026 ka nang pynkhlaiñ shuh shuh da ka jingkyrshan jong ki Tnad Fisheries jong baroh phra tylli ki jylla ka thaiñshateilammihngi – Assam, Arunachal Pradesh, Manipur, Meghalaya, Mizoram, Nagaland, Sikkim bad Tripura, ha kaba ka Assam kalong kum ka Jylla ha kaba la pynlong ia ka jingialang. Kine ki tnad ki don ka bynta kaba kongsan ha ka jingthmu ba iadei bad ka kam ri dohkha, ka jingkyntiew ia ki jingdon jingem, ka jingpyndonkam ia ka teknoloji, bad ka jingpyntreikam ia ki skhim jong ka sorkarpdeng.

La khmih lynti ba kane ka jingïalangkan pdiang palat sanphew ngut ki nongpyni mar, ha ryngkat ki scientist na ka Indian Council of Agricultural Research (ICAR) bad ki nongrep na kylleng ka ri.

Ka Jingialang bad ki lad pathai khubor ka thmu ruh ban wanrah ka jingnsngewthuh bad pynthikna ïa ka jingpynbna paidbahïa ka Aquaex Northeast 2026 hapdeng ki nongshim bynta bad ki riewpaidbah.

Ha ka jingialang la donlang u Ashim Kumar Borah, Senior Executive (Tech) & Officer-in-Charge jong ka NFDB-NERC, Guwahati; u Anup Sarmah uba long u dkhot jong ka Governing Body ka NFDB, Tnad Fisheries jong ka sorkar India bad u Rajnish Kumar, u dkhot ka Governing Body jong ka NFDB bad u Convenor jong ka AquaEx, Hyderabad.