Paw ki skul na thain kyndong, pass 83 persen kiba iakhun eksam klas 12

Ka Meghalaya Board of School Education (MBoSE) ka la pynbna ia ka Result jong ka Higher Secondary School Arts, Science bad Commerce hynne ka sngi ha kaba ka Pass Percentage ha kitei baroh lait tylli ki eksamin ka la long palat ia ka 83 Percent, katba ha ka Vocational Stream ka jingpass ki khynnah ka long 95.23 Percent.

Ha ka HSSLC Science, u Dechro M Marak jongka Don Bosco College (Hr. Sec. Section), Tura ula ioh ia ka First Position da kaba ioh 472 marks bad Distinction ha ka (E,M,Ph,Ch,Bio), katba u Amos Chinminlun jong ka St. Anthony’s Higher Secondary School, Shillong ula ioh ia ka Second Position bad ioh 470 marks bad distinction ha ka (E,CS,Ph,Ch,M,Ae) bad ia ka Third Position la ioh da u Vishal Rai jongka Laban Bengalee Boys’ Hr. Sec. School, Shillong uba la ioh 464 marks bad distinction ia ka (E,CS,Ph,Ch,M).

Ha ka HSSLC Science mynta u snem, kila don 3732 ngut kiba la ialeh bad kiba la pass ki don 3124 kaba long 83.70 percent.

Ka South West Garo Hills ka kot haduh 100% kiba pass, bud sa ka West Khasi Hills kaba kot 95.78% bad ka West Jaintia Hills ba kot 93.50%.

Ha ka HSSLC Arts, ka Meghashree Roy jong ka St. Mary’s Higher Secondary School, Shillong kala bat ia ka First Position da kaba ioh 457 marks bad Distinction ha ka (E,Ec,HSc,Ed,Ps,Ae), u Joziah Daman Laloo jongka St. Anthony’s Higher Secondary School, Shillong ula ioh ia ka Second Position bad ioh 452 marks bad distinction ha ka (E,Hs,Sg,Pls,Ps) bad ka Nakisakahuni M Pakyntein jong ka St. Anthony’s Higher Secondary School, Shillong kaba la ioh 446 marks kala ioh ia ka Third Position bad distinction ha (E,Ps,Sg,Hs,Pls).

Ha ka Arts kila don 23559 ngut kiba la ialeh bad kiba la pass ki don 20882 kaba long 88.63 percent.

Ka East Khasi Hills bad ka Eastern West Khasi Hills ki dei ki district kaba bun eh ki samla pule kiba pass kaba kot haduh 96.20%, katba ka West Khasi Hills kala kynjoh sha ka 94.94% bad ka West Jaintia Hills kala long 92.98%.

Ha ka HSSLC Commerce, ia ka First Position la ioh da ka Priya Ghosh jong ka St. Edmund’s Higher Secondary School, Shillong kaba la ioh 458 marks bad distinction ha ka (E,En,Ec,Bs,Ac,Ae), ia ka Second Position lah ioh da ka Ankita Das jong ka St. Anthony’s Higher Secondary School, Shillong kaba la ioh 453 marks bad distinction ha ka (E,En,Ec,Bs,Ac) bad ia ka Third Position la ioh da ka

Rishika Debnath jong ka St. Anthony’s Higher Secondary School, Shillong kaba la ioh 452 marks bad Distinction ha ka (E,En,IP,Bs,Ac,Ec).

Ha ka Commerce kila don 2463 ngut kiba la ialeh bad kiba la pass ki don 2155 kaba long 87.49 percent.

Ha ka liang ki District, ka East Jaintia Hills kala wan hakhmat ha kaba ka jingpass ki khynnah ka long 98.18%, katba ka jingpass ki khynnah ha West Jaintia Hills ka long 94.70% bad ha Eastern West Khasi Hills ka jingpass ki khynnah ka long 94.68%.

Haba phai pat sha ka Vocational Stream ka jingpass ki khynanh ka long 95.23%, ha kaba 20 na ki 21 ngut ki kyrtong kila pass ia ka eksam.