Ka sain pyrthei ha jylla ka lah ban kylla

Ka Bharatya Janata Party (BJP) ba bat ia ka bor synshar ha Ri, ka la thaw history hadien ba ka la jop kput pyrshah TMC ha jylla West Bengal ha ka resol ilekshon MLA ba la pynbna mynta ka sngi.Katkum ka resol na ki saw tylli ki jylla bad Union Territory ka BJP ka khur ia ka jingjop ha ki lai tylli ki jylla, kata ha West Bengal, Assam, Pondicherry, katba ka United Democratic Front (UDF) ka khur ia ka jingjop ha Kerela bad ka Tamilaga Vettri Kazhagam (TVK) ha Tamil Nadu, katba ka Congress kam shym la jop hynrei ka lait brut ha West Bengal bad jop iwei.Ka BJP ka la khur ia ka jingjop ha West Bengal haduh 131, katba ka TMC ba bat ia ka bor synhar hapoh ka jingialam ka Mamata Benerjee ka la ioh tang 83 bad ka Congress 1.

Ha Tamil Nadu ka Tamilaga Vettri Kazhagam (TVK) ka seng sain hima thymmai hapoh ka jingialam u actor Chandrasekaran Joseph Vijay ka la jop 110, ka DMK 57 bad ka AIADMK 67.Katba Assam ka BJP hapoh ka jingialam u Himanta Biswa Sarma kum u Myntri Rangbah, ka khur biang ia ka jingjop da 99 ngut, ka Congress 24, AIUDF 2 bad uwei u kyrtong shimet. Ha Kerela ka  United Democratic Front (UDF) ka khur ia ka jingjop da 98 ngut, ka LDF 39 bad ka NDA 2 ngut. Ka jingshah rem ka Congress ha kane ilekshon MLA ka pynpaw ba ki paidbah kim don shuh ka jingshaniah hapoh ka jingialam na ka longiing jong ki Gandhi kaba ki paidbah ki niew burom baroh shi katta naduh ki por jong u Mahatma Gandhi, ka Indira Gandhi bad Rajiv Gandhi.

Kumjuh  ka Myntri Rangbah ka West Bengal ka Mamata Benerjee ba ju khot ieit ‘DD’ ka hap ban hiar shuki kum ka myntri rangbah hadien 16 snem ba la synshar ia ka jylla West Bengal, kine ki pynpaw ia ki dak ki shin ka jingkylla jong ha sain pyrthei ha ki jylla bad ka ri bad ki lah ban jia ruh ha ka jylla Meghalaya.