Ka long shisha ka sngi kaba la ai jingkmen ia ki nongialam bad ki dkhot ka Synjuk ki Rangbah Shnong ka Ri Bhoi District ha kaba lyngba ka General Council ba la long mynta ka sngi, u Myntri Rangbah ka Jylla u Conrad K Sangma u la pynbna ban aiti ia ka song pisa kaba 50 lak tyngka na ka skhim Chief Minister’s Special Development Scheme bad na ka Meghalaya Basin Development Authority.
Ia kane la pynbna ha ka jingialang jong ka kynhun ki nongialam Shnong hapoh ka shatri jong ka Synjuk ki Rangbah Shnong Ri Bhoi District kaba la long ha St. Paul Parish Hall ha Nongpoh ha kaba la iashim bynta da ki Rangbah Shnong bapher bapher ban iatai halor ki mat ba donkam ban kyntiew ia ka roi ka par, ki jingeh bad ki jingdonkam jong ki shnong ki thaw.
Ha kane ka jingialang jong ki nongialam Shnong lyngba ka SRS Ri Bhoi District, la sakhi ruh ia ka jingiadonlang naduh u Symbut Myntri Rangbah ka Jylla u Bah Prestone Tynsong, ki Myntri sorkar jylla ba kynthup ia u Timothy D. Shira bad u Bah Sosthenes Sohtun, u Bah Mayralborn Syiem, MLA ka Nongpoh, u Bah Charles Marngar, MLA ka Mawhati, u Bah BB Makdoh, President ka SRS, u Bah PB Sylliang, Secretary nalor kiwei kiwei ki heh sorkar bad ki riew pawkhmat paidbah.
Na ka liang ka SRS ka la ai da ka dorkhas ha u Myntri Rangbah ka Jylla, ha kaba la kdew ia ki jingdonkam ha ka district kynthup ia ka Government College ha Nongpoh, ka jingpyntbit pynbiang ia ka jingsam bording ilektrik, ban pyntikna ia ki kyndon na bynta ki jingdie ia ki jingri kum ki sniang bad kiwei kiwei, ban phaikhmat ruh sha ki jingdonkam ha ki shnong khappud khamtam halor ki jingeh ba la mih ha ki shnong ka thaiñ Mawlasnai nalor kiwei kiwei.
Haba kren ha kane ka programme, u Conrad K Sangma kum u Myntri Rangbah ka Jylla, u la ai ka jingiaroh kaba khraw halor ki matti treikam jong ka Synjuk da ka jingiatreilang jong ki Rangbah Shnong jong ki shnong kane ka district ban peit ia ka bha ka miat, ban kyntiew ia ki Shnong ki thaw ha ki kam pynroi, ka shongsuk shongshngaiñ nalor ki jingeh ba mad da ki paidbah nongshong shnong, ki nongrep bad kiwei kiwei.
U la pynpaw ruh, ba ka sorkar jylla naduh ba la shimti ha u snem 2018, shibun ki kam pynroi ki la iaid shakhmat bad bun ki jingkylla ki la wan urlong lada kheiñ ha ki liang ka pule puthi, ki lynti synkien, ki jaka sumar pang paidbah bad kiwei kiwei nalor ka jingkyntiew ia ki jingtei ba kongsan bad ban wanrah ruh ia ki programme kiban iarap ban kyntiew ia ki nongrep, ki samla pule, ki seng treimon sngewbha bad kiwei kiwei kiba la pynmyntoi shikatdei eh bad kum ka sorkar jylla hi kan nang iai bteng ban bynrap ia ki kam ban kyntiew ia ka roi ka par.
Halor ka dorkhas jong ka SRS, na ka liang u Conrad u la kular ban shimkhia ban khmieh bniah bad ban shong pyrkhat bad ki tnad treikam sorkar kiba ia dei bad ki jingdawa khamtam ha kaba ia dei bad ka jingangnud ban ioh ia ka Kolej sorkar ha Nongpoh nalor ka jingiakren halor ki kam khappud bad ka sorkar Assam, ka jinghap ban pynbun ia ki nongtrei ha ki jaka ai jingsumar paidbah bad kiwei kiwei, da kaba bynrap ruh halor ka jingsam bording u la kdew ba ka 132 KV Power Sub Station kaba la tei ha Nongpoh ka la jan dep artad bad kan ai jingmyntoi shibun eh ha ka jingsam bording nalor ka jingpynkhlaiñ ia ki substation bad ka jingpynbiang nongtrei ha ka tnad sam bording.
Ha kane kajuh ka sngi la pynlait ruh ia ki 37 tylli ki kali kit niut ia kiba la aiti sha ki Village Cluster kiba hap hapoh ka Nongpoh bad Jirang C&RD Block.