U President ka Khasi Authors Society (KAS) u Dr D.R.L Nonglait hynne ka sngi, ula phah shithi sha ka seng National Peoples Party (NPP) ba u pdiang ia ka jingtyrwa ban iakhun kum u kyrtong ka NPP ha ka elekshon shiteng samoi ne Bye Election jong ka MP Lok Sabha na Shillong Parliamentary Constituency.
Ha ka shithi ba la phah sha u President bad Working President ka NPP, u Dr D.R.L Nonglait ula pyntip ba ula pdiang ia ka jingtyrwa ka seng NPP ba un iakhun ia ka elekshon MP Lok Sabha na Shillong Constituency na ka NPP.
“Nga kwah ban pynpaw ia ka jingsngewnguh ia ki nongialam bad ia ki dkhot jong ka NPP kiba la don ia ka jingshaniah bad ka jingskhem jingmut ha nga, da kaba tyrwa ia nga da ka lad ban iakhun ia ka elekshon shiteng samoi jong ka MP Lok Sabha 2026 na ka tiket jong ka seng NPP. Hadien ba nga lah bishar bniah bha, nga dap da ka jingsngewbha ban pyntip sha phi, ba nga lah pdiang ia katei ka jingtyrwa” la pynpaw u Dr D.R.L Nonglait ha ka shithi.
“Ngan trei met bad mynsiem bad ruh ban bud ryntih ia ki nongrim jong ka seng, ki jingiohi jngai (Vision) bad ka jingshim rai lang ka seng baroh kawei bad ban trei minot na ka bynta ka bha ka miat ki paitbah ka Jylla bad ka Ri” la ong u Dr Nonglait bad u khmih lynti ba un ioh ia ka jingbtin, jingkyrshan bad ka jingiatreilang na ki nongialam bad ki nongtrei ka seng bad ki paralok ban rah shakhmat ia ka jingkitkhlieh da ka jingtrei shitom bad da ka jingaiti lut.
Kum ban pynpaw ha ki taiew ba la dep, ki nongialam ka NPP ki la leit iakynduh ia u Dr D.R.L Nonglait bad tyrwa ban iakhun ia ka ilekshon MP shiteng samoi. Hadien ba u Dr Nonglait ula puson bad pyrkhat ula shim ka rai ban pdiang ia katei ka jingtyrwa ban iakhun kum u kyrtong ka NPP ha ka ilekshon MP.
U Dr Nonglait u dei nongialam Rangbah ka Khasi Authors Society (KAS) ka kynhun ban pynneh ia ka ktien Khasi ha ka thoh ka tar da kaba kynthup ha ka Eight Schedule ne khyrnit ba phra ka riti synshar ka Ri.
Ka KAS hapoh ka jingialam jong u ka la leit ban ialap bad pynlong ia ki jingialang ha kylleng ki jaka na ka bynta ban dawa ban pynioh jingithuh noh ia ka ktien Khasi bad ka KAS ka la leit ruh ban pynlong syndon ia ka jingiakhih ha Nongbah Delhi ban dawa na ka Sorkar Pdeng ban ithuh bad ban pynrung noh ia ka ktien Khasi ha ka Eight Schedule jong ka ri India.
Ka jingiai bteng ka KAS ban dawa jingithuh ia ka ktien Khasi, ka la pynlong ruh ia ka Sorkar MDA ban ithuh noh ia ka ktien Khasi bad Garo kum ki Official Language ka jylla Meghalaya.