Leit tur ki paidbah Hima Sohra ha ophis KHADC

Ki nongialam Khlieh Nongsynshar bad ki Riew Rangbah ka Hima Sohra hynne ka sngi ki la pynpaw ka jingsngewsih ia ka jingeh dohnud ka EC ba ialam da ka Voice of the People (VPP) ha KHADC, halor ka jingdawa ban ai Sanad noh ia u Paiem Maremdor Sing Syiem uba la jied da ka Dorbar jong ka Hima Sohra.

Ha kane ka sngi ki paidbah ka Hima Sohra da ki spah ngut ki la iatur sha District Council ban dawa bad pynrem jur ia ka EC kaba la leh mynthi la 6 bnai ia ki jingdawa jong ki ban ai Sanad noh ia u Paiem Maremdor uba ka Dorbar ka Hima Sohra ka la jied ia u ban long Syiem hadien ka jingkhlad noh jong u Paiem Freeman Sing Syiem (Bam Kwai ha Dwar u Blei) .

Hadien ka jingwan tur ki paidbah, na ka liang ka EC ka KHADC ka la khot ia ki nongialam Khlieh Nongsynshar ban wan sha ka miej jingiakren.

Hadien ba la wai ka jingialang, ki khlieh nongsynshar shnong u bah Wellborn Bynnud, u Adviser ka Hima Khasi u bah Lebirios Syiem, ryngkat ka jingdonlang ki Rangbah Shnong bad kiwei de, ki la pynpaw ba kim shym la sngewhun ia ka jingiakren namar ba kim shym la ai ia ka sanad kaba ki la dawa.

Haba kren sha ki lad pathai khubor, u bah Wellborn ula ong ba ka EC kam shym la lah ban ai ia ka Sanad da kaba aidaw ba u dang don sa uwei u Rangbah u bah P. Syiem uba kwah ban ialeh Syiem na ka Hima Sohra.

Katkum ka jingong u bah Wellborn u bah P. Syiem um dei na ka Hima Sohra bad udei uba la shong sha Mairang da ki spah snem bad um don wat tang ia ka iing sad ha Sohra.

“ Ngim tip kaei kata ka Syiem Kynthei kaba sei Syiem ia u bad ngim tip ruh kiei kita ki Myntri kiba kyrshan ia u. Hynrei na District Council pat ki pynmih shi pynmih ia ka kyrteng u P. Syiem ba ki hap ban ai ia ka jingbishar ba hok na bynta jong u,” ula ong.

Ula iathuh ba na ka liang jong ki, ki la pynshai ba ha Hima Sohra kam don kano ka jingiakhnieh Syiem bad da kaba suk ba sain haba ki Myntri ki Korbari ki la leit pan Syiem na ka Syiem Sad na Sohra, ka la sei beit ia u Paiem Maremdor Sing Syiem bad bynrap, “ Ia u Paiem Maremdor la wanrah da ki Myntri sha ka Executive Committee bad ha ka 3 tarik, Naiwieng la khot ia ka Dorbar bah ka Hima Sohra ba yn pynskhem ia u Paiem Maremdor.”

U nongialam khlieh nOngsynshar , ula ong ba ba ha ka Dorbar ym shym la lap ba don uno uno uba kwah ban ialeh Syiem bad ym don da uwei pat uba biang ban long Syiem ha ka Hima Sohra lait na u Paiem Maremdor.

“La 6 bnai ngi la leit ban aiti ia ki kot ki sla ha District Council , hynrei ki leh bym patiaw bad i kumba kim i mon ban ai Sanad ia u Paiem Maremdor bad kane ka la pyllong ia u Khun hajar ka Hima Sohra ban bitar ban tur paidbah sha District Council,” ula ong.

Ha kajuh ka por, na ka liang u bah Lebirious Syiem ula ong ba ki la pynshai kdar ia ka EC haba iadei bad ka sain Dorbar u khasi.

“ Ngi la pynshai kdar ia ki ba ha ka Dorbar iing la jied ia u Kni jong ka kpoh iing la jied da ka kpoh, ha ka Dorbar Kur kadei ka hok jong ka Dorbar Kur ban jied ia u Kni jong ka Kur da ki Kur, ha ki shnong kadei ka hok katkum ka riti ba la jied ia u Rangbah Shnong, u tymmen Shnong ne u Sordar shnong da ka shnong, bad ia u Syiem la lah ban jied katkum ka hok ka riti dei tang kita kiba don hok ha ka Hima bad ia u Syiem ka Hima Sohra la jied la pyndep ia ka katkum ka hok ka riti dustur bad la wanrah ruh ha ka Dorbar Hima bad kaba kongsan eh ka long ba la pyndep ruh ia ka niam bad kaba sah ka long ba ka KHADC kan ai ia ka sanad,” ong u bah Lebirious.

Na ka liang ki Khlieh Nongsynshar Shnong bad ki Riew Rangbah ka Hima Sohra ki la kyntu ia kane ka EC ba kam dei ban wanrah ia ki kam ialeh Party Politik namar kan pyniap ia ka riti dustur u Khasi.

Ula ong ba ka kamram ka District Council ka long ban peit ban da ia ka riti dustur , ym ban thaw ain da kawei pat.

Na ka liang ka Hima kan sa shong mar mar bad kan sa shim rai ha ka Dorbar ia ki sienjam ba kan iaid shakhmat.