U Myntri Rangbah ka Jylla u Conrad K Sangma hynne ka sngi, ula ong ba ka kam jngohkai ha Meghalaya kan long kaba jop tang lada baroh ki kynhun kin iatreilang kum shibynta jong ka jinglong jingman kaba kham iar.U Conrad ula kren ia kane ha ka jingialang pynkupbor ia ki Tourism Champion ka Meghalaya kaba la pynlong ha Orchid Lake, Umiam.U Myntri Rangbah ula niew ia kane ka jingialang kum u mawmer ba kongsan ha ka jingiaid lynti ka kam jngohkai ha Meghalaya bad ula ai khublei ia ka Tnad Jngohkai, ki Kynhun ba don bynta, ki nongsengkam hala ki jong ki shnong ki thaw namar ka jingiapyrshang lang ban pynskhem ia ka jingdon ka Meghalaya ha ka National Tourism Map bad ka jingnang paw ha ka kam jngohkai pyrthei.Ula ong, ba ka kam jngohkai kan ym long kaba jop lyngba ka jingpyrshang jong ka Sorkar marwei, lane lyngba ka jingpyrshang jong ki trai hotel shimet, ki nongniah taksi, ki trai Restaurant lane kino kino ki kynhun ba don bynta ha ki kam jngohkai kiba trei marwei marwei.“Ka kam jngohkai ka thnem tang lada baroh ki kynhun ba don bynta ha ka kam ki shim iala ka jong ka bynta” ula ong, haba bynrap ba wat hapdeng ki jingeh kiba bun, ka Meghalaya kala sdang ha ka lynti kaba khlain ban kyntiew ia ka kam jngohkai” ong u Conrad bad ka ong ba ka kam jngohkai kam kut tang ha ki tamasa, hotel lane ki prokram ban pyni ia ka riti dustur hynrei kadei ha kaban thaw ia ka jinglong jingman kaba pura kaban ai mynsiem ia ki nongshangkai ba kin jied ia ka Meghalaya kum ka jaka ba kin wan.
“Haba ka longiing ka iashong lang shijaka bad rai shano ba ki kwah ban leitkai, ka Meghalaya ka dei ban paw. Ka Meghalaya ka dei ban khring. Ka Meghalaya ka dei ban long ka jaka ba kan mihpaw ha ka jingmut jingpyrkhat jong ki” ula ong bad ka bynrap “Ka thong jong ngi ka long kaba suk-man ki nongjngohkai kiba wan sha Meghalaya ki dei ban mih ryngkat ki jingkynmaw ki ban neh shirta ka jingim”.Haba kren halor ka jingkynshew pisa ka Sorkar ha ka jingpyn pawnam ia ka kam jngohkai bad ki jingtei, ula ong ba ki jingialang, ki tasama bad ki project kam jngohkai ki don ia ka bynta ba kongsan ha kaba pynwandur ia ka jingsngewthuh bad ban khring ia ki nongwan shangkai sha ka Jylla.Haba kren halor ka lynti iaid ka Jylla ha ki kam jngohkai, ula ong ba katto katne ki project ba pawnam ki dang don ha ka jingpyntrei mynta, kynthup ka Shillong Ropewat, ka Mawkdok Skywalk, ka Rain Museum ha Mawsynram, ka Living Root Bridge Museum, bad ki Tourist Centre ha Sohra, Mandalgre bad Siju.U Conrad ula pynbna ruh ia ka jingkylla kaba khraw ha ki lad pyniasoh, haba pynpaw ba ka jingpynheh ia ka Shillong Airport kala iaid shakhmat mynta, ha kaba ka jingpyntrei pynheh ia ka ‘Runway’ la dep ban aiti da ka Sorkar India. U ong, ba ia ka project la khmih lynti ban pyndep la kumno kumno ruh hapoh ka 15 bnai bad kan plie lad ia ki liengsuin kiba heh ba kin wan haduh Shillong. Nalor kane ula ai khublei ia ki nongioh jingmyntoi bad ki kynhun kiba don bynta ha ki kam jngohkai, ula iai ban, ba man ki sienjam bala shim da ka Sorkar kadei kaba la pynwandur ban pynkha ia ki kabu na ka bynta ki nongshongshnong.
Ia kane ka prokram la pynlong da ka Tnad Jngohkai, ka Sorkar Jylla, kala wanrah lang ia ki kynhun kiba don bynta ha ki kam jngohkai, ki nongsengkam, ki nongshna jingshna, ki samla pule, ki nongialam shnong bad ki nongioh jingmyntoi na kylleng jong ka Jylla.U Myntri Rangbah ula aiti ia ka khusnam “Bravery Award” sha u Teiborlang Pakma uba la pynlait im ia uwei u briew ba ngam jyllop ha Nan Polok bad ula pynbna ruh ia ki nongioh jingmyntoi ba thymmai hapoh ka Chief Minister’s Meghalaya Home Stay Misson bad ai jingithuh ia ki nongioh jingmyntoi kiba jop ha ka jingtreikam hapoh ka Chief Minister’s Homestay Scheme-PMEG bad ula sam ruh ia ki ‘Sanction Letter’ hapoh ka Community-Led Infrastructure Scheme, kaba thmu ban pynkupbor ia ki Shnong ki thaw, ki Cooperatives bad ki Tourism Society ba kin pyntrei ia ki jingtei kam jngohkai ha ki jaka jngohkai ba dang sdang paw bad sdang bun ki nongwankai.Katba 20 tylli ki project kila iaid shaid shaid mynta ha ka jingpyntreikam, ka Sorkar hynne ka sngi kala pynbna sa 58 ngut ki nongioh jingmyntoi ba thymmai na ka thain Khasi, Jaintia bad Ri-Bhoi, da ka jingmang ia ka song jingiarap ba kot T.3.40 klur. Ka Sorkar ka la pynbna ruh ia ka jingtynruh ban pynbha ia ki jingdonkam paidbah ha ki jaka shangkai kiba don ha kylleng ka Jylla. Ka jingpynbiang ia ki jaka leit bar ki dang iaid shaid shaid ha ka jingpyntrei mynta, jingmaramor, lane kyntiew kyrdan ia 84 tylli ki jaka jngohkai hapoh ki skhim bapher bapher. Tang hapoh ka State Scheme, 17 tylli ki jaka jngohkai kiba heh, kynthup ka Living Root Bridge, Nan Polok, Laitlum, Mawphanlur, Umiam Lake View Point, Kshaid Krang Suri, Wari Chora bad Siju, kila don mynta ia ki jaka leit bar kat kum ka juk ia kiba la pynlut haduh T. 3.44 klur. Ki samla pule jong ka Institute of Hotel Management Shillong ruh kila ioh pdiang ia ka scholarship certificate hapoh ka Chief Minister’s Meghalaya Hospitality Scholarship Scheme. Haduh mynta, 21 ngut ki samla pule kila ioh ia ka scholarship ba siew pura ia ka bai pule kaba kot T.3.67 lak marwei, katba 37 ngut ki samla pule kila ioh ia ka stipend ba shisnem kaba long T.32,000 hapoh ka reserve category jong u snem pule 2023-24 haduh 2025-26. Ha kane ka jingialang la ia donlang ruh u u Symbud Myntri Rangbah ka jylla u Bah Prestone Tynsong, u Myntri ka kam Jngohkai u Timothy D Shira, u MLA ka Umsning u Dr Celestine Lyngdoh, u MLA ka Mawhati Bah Charles Marngar, MLA barim bad nongaibuit ka Tnad Jngohkai Bah Lambor Malngiang, ki Heh Ophisar Sorkar bad kiwei kiwei.