Puk tur spah ngut ki paidbah Lapangap sha Secretariat, synreit lyer pynsat khmat ki pulit

Ki pulit ka jylla hynne ka sngi ki la synreit naphang da ka ‘Pepper Spray’ ban pynpra ia ki spah ngut ki paidbah ka Lapangap kiba la wan tur puk hakhmat Secretariat.Mar ia synreit ki pulit ia ka spray ki paidbah ki la ia jyrhoh, sat ki khmat bad ka la mih ruh ka jingiakhluit iania hapdeng ki paidbah bad ki pulit ha katei la por.Ha kane ka sngi da ki spah ngut ki nongshong shnong ka Lapangap, West Jaintia Hills district ryngkat ka jingsynranlang ki dkhot ka Khasi Students’ Union (KSU) bad kiwei de, ki la pyllong ia ka jingiakhih da kaba iaid paidbah bad tur sha Secretariat ban dawa na ka sorkar ba kadei ban tuklar ban weng ia ki jingeh ba mih ha ki jaka khappud jong ka jylla Assam-Meghalaya kaba la pynthut ia ka rep ka riang jong ki paidbah ha katei ka thain.Ia kane ka jingiakhih la pyllong ban pynbor ia ka sorkar ban ai jingiada ia ki nongrep na Lapangap kiba la kam ba kim iaaoh ban rep ban riang namar ka jingsheptieng bad la kynnoh ba ka jingdon jong ki pulit ka Assam bad ka jingiakajia kaba mih na ka por sha ka por, ka la khanglad ia ki paidbah ban rep ban ot kba.Ha shwa ban sdang ka jingiaid paidbah, ka sorkar jylla ka la phah ktien sha ki nongialam ka Lapangap ba la shah tang 10 ngut ki nongialam ban wan iakren bad ka sorkar. Hynrei ki paidbah khlem ka sheptieng ki la tur puk haduh hakhmat ka khyrdop ka Secretariat.

Ha kane ka sngi, ki paidbah ki la ia iaid paidbah ryngkat ki plakad ba la dawa ba dei ban pynbeit mardor halor ka jingshah pynthut bad ka jingbym ioh ki nongrep ban rep suk ha ki jaka rep, ban pynkynriah noh ia ka ktem ki pulit Assam kaba don ha u Lum Pynthor ha Lapangap, ban weng mardor ia ka “GPS Line” kaba paw ha Google Maps kaba la pruid jubor da ka sorkar Assam bad kadei ban ai jingiada pura ia ki nongrep ka Lapangap.Nalor kane, ki paidbah ynda ki la poi ha khyrdop Secretariat, kila pynmih ia ka sur pyrta ba u Myntri Rangbah u Conrad K Sangma bad ki Symbud kongsan u bah Prestone Tynsong bad bah Sniawbhalang Dhar, kidei ban hiar shuki noh namar ka jingbym ler jong ki ban weng ia ka jingeh jong ki nongshong shnong.Haba kren sha ki lad pathai khubor, u Rangbah shnong ka Lapangap u bah Deimonmi Lyngdoh ula ong ba ki nongshong shnong ki hap ban wan da lade ha nongbah Shillong ban kyntu ia ka sorkar ba kadei ban shim ia ki sienjam ban weng ia ki jingeh jong ki paidbah nongrep. U la ong ba watla la poi ka aiom ot kba, bun na ki nongshong shnong kim ioh lad ban trei ban ktah namar ka jingsheptieng na ka jingshah pyndik ha ki pulit ka Assam.

“Ka jingthmu jong ngi ka long ban pyllong ia ka jingiakhih ba jai jai bad ban kyntu ia ka sorkar jylla ba kan leh eiei na bynta ki nongrep. Ka jingiakajia bad ki briew ka Karbi ka dang iai bteng naduh u snem 2023 bad ka jingeh ka dang iai don haduh mynta,” ong u bah Deimonmi.Katba u nongialam ka KSU Nartiang Circle u bah Chanbor War ula ong ba ka seng ka la wan iasoh ia kane ka jingiakhih ban ai ka jingkyrshan ia ki paidbah ka Lapangap.U la kynnoh ba ki don bun bah ki jingialang ba la long hapdeng ki bor pyniaid ka District West Jaintia Hills bad ka West Karbi Anglong, hynrei kim shym la poi sha kano kano ka jingseisoh.U la bynrap ba ka seng ka kwah ba ka sorkar jylla kadei ban pyntikna ba ki nongrep kidei ban iohrep bad kin ioh ot ia u kba khlem kano kano ka jingshah pyndik.“ Ngim kwah ba ka jingiakajia khappud bad ki nongrep, kan iakhleh politik. Ki paidbah ka Lapangap kila mad jingeh bad ngi wan hangne ban ai jingkyrshan ia ki,” ula bynrap.