Buh thong ka DREAM ban buh 8 tylli ki Detoxification Centre bad Rehabilitation Centre

Ka Drug Reduction Elimination and Action Mission (DREAM) kan sa buh ia ki Detoxification Centre ha man la ki Civil Hospital bad sa 8 tylli ki Rehabilitation Centre ha kine ki 6 bnai kiban wan.Ia kane la pyntip u Mission Director ka DREAN u Bah Francis Kharshiing hadien ka jingialang ba la lum da u Myntri Rangbah ka Jylla u Conrad K Sangma.Haba kren sha ki lad pathai khubor u Bah Francis ula ong, “U Myntri Rangbah ka jylla u long u nongialam ba tbit bad uba pynleit jingmut ha ki mat kiba lah ban treikam. Ngi lah pyni ia ki katto katne ki jingtyrwa bad ia ki sien jam kiba ngi lah ban shim. U la iaroh ia ki kam kiba ngi lah leh haduh mynta bad ula buh ruh ia ka thong na bynta jong ngi, kynthup ka jingpyniaid ia ka App”.

Ula ong, ba u Myntri Rangbah ula buh ia ka por ban pyniar ia ki jingdonkam ha kylleng ki district. “Ha kiba bun ki district jong ka jylla, ula buh ia ka por ban na ka bynta ban tei ia ki Rehabilitation Centre. Ngi dang trei ia ka kam halor katei ka bynta” ula ong.Naduh ba la sdang ia ka DREAM Mission ha u snem 2023, 4 tylli ki Rehabilitation Centre ki la sdang treikam.“Ngi la lah ban iaid shakhmat bha. Naduh ba la sdang ia ka DREAM Mission ha u 2023, ngi la buh ia ki 4 tylli ki Rehabilitation Centre. Ha ki por ban wan, hapoh jong ka 6 bnai, ngi khmih lynti ban tei sa 8 tylli ki Rehab Centre” la ong u Bah Francis.Haba batai pat halor kiwei pat ki jingthmu, ula ong “Ngi dang peit ban tei ia ki Detox Centre ha man ki Civil Hospital ha kylleng ki District bad ngi dang trei ruh halor ki katto katne kiwei pat ki projek” ong u Bah Francis da kaba pynpaw ba ka jingiashim bynta lang ka imlang sahlang kala long kaba biang bha.

“Ka la don ka jingshim khia lang. Hynin ka sngi, nga la lum ia ka jingialang bad baroh ki Rangbah Shnong ha West Khasi Hills bad nga dap da ka jingkyndit ba palat 200 ngut ki la wan ban iashim bynta. Kane ka pyni ba mynta ki la shaniah ia ka kam kaba ngi trei bad ka jingiakren bad jingiatai ruh ka la long kaba sngewtynnad. Tad lada ngim donlang ia ka imlang sahlang, ngi ngin ym lah ban pynbeit ia katei ka jingeh” ula ong.Ula bynrap ba ka Mission kan sa pynlong ruh ia ka jingialam jngohkai ia ki samla kiba la shah ktah.“Kawei na ki rai kaba ngi lah shim mynta ka sngi, ka dei ban ialam jngohkai ia ki khynnah kiba la iehnoh shiteng por ia ka jingpule ha ki skul. Ngi kwah ban kyrshan ia ki ban ioh jinghikai pyntbit ha ITI Don Bosco Technical School,” ula ong.