Shimkhia ka Sorkar Meghalaya-Assam halor ka jingïakynad ha Lapangap

Ki Myntri Rangbah ka Meghalaya bad Assam ki la shimkhia bha ban iakren pynbeit noh ia ka jingiakynad ha Lapangap, ong u Symbud Myntri Rangbah u Bah Sniawbhalang Dhar ha ka sngi Nyngkong, hadien ka jingialang bad ki nongshong shnong kaba ym shym la lah ban shim rai.

Haba kren sha ki lad pathai khubor u Bah Sniawbhalang ula ong, “Baroh 2 ngut ki Myntri Rangbah ki la iakren halor kane ka kam bad ki la shimkhia bha bad kane ka kam ka dei kaba la iaid ha ka jingiakren pynbeit ha ka kyrdan ba halor eh”.

Kane ka jingkren ka la mih hadien ba ki nongmihkhmat na baroh artylli ki Shnong ki la iakynduh ha ka jingiadonlang ki Deputy Commissioner bad Superintendent Police na Meghalaya bad Assam.

“Ka la don ka jingialang hapdeng ki Shnong ha ka jingdonlang ki bor district na baroh arliang” ong u Bah Dhar. “Ka jingialang ka biang bad ka la iaid suk hynrei ula pynthikna ba kam shym la don kano kano ka jingshim rai”.

“Ki dang don katto katne ki kam kiba dang sah” ula ong. “Khatduh, ka rai ba kumno ban iaid shakhmat, ngim pat lah ban rai bad ngin sa iapeit ha kine ki ar sngi lane lai sngi ban wan”.

Ka kam rep kam riang ha kane ka jaka ba iakajia ka dang sahkut bad ym pat lah ban pyniaid shakhmat.

Haba kylli la ka rep ka riang ka la sdang biang, u Bah Sniawbha ula ong, “Kat haduh mynta ka sngi, kam pat sdang satia”.

Ula pynshai ba ka jingiakajia ha Lapangap kam dei satia shibynta jong ka jingiakren pynbeit khappud.

“Halor ka kam Lapangap, kam dei ka jingiakajia pud, ka dei eh halor ka jakpoh” ula ong.

Halor ka wat kaba ar jong ka jingiakren pynbeit pud, u Bah Sniawbha ula ong ba ka Meghalaya ka dang ap ia ka Assam ba kan thung biang ia ka Regional Committee.