Lap i’u rangbah ba sdien phasi ha dukan, suba kiba haiing ba shah pyniap

Ha kawei na ki jingjia kaba sngew shyrkhei ki paidbah ka Shnong Permadan ha ka step 19 tarik u Jymmang 2026 ki la lap ïa ka met ïap u rangbah ha u tyllai phasi hapoh dukan die sha ba don ha stetion pynïeng kali ha ka shnong Permadan.

Ïa utei u rangbah ba la khlad la tip kyrteng kum u bah Tailin Lyngdoh Nonglait, 54 snem ka rta uba shong ba sah ha Permadan, Eastern West Khasi Hills District

Ka trai kaba die sha ha kane ka dukan ka la ïathuh ba u bah Tailin u dei u kynja knie bad u ju wan ban pynkhang bad ban pynplie dukan ïa ka mynta la saw bnai namar ka dang rit khun bad ha ka miet 18 tarik u Jymmang, 2026 ula wan phai na dukan ryngkat bad u lok jong ka hynrei namar ba u klet ïa ka mobile ha dukan ula leit phai biang sha dukan marwei ban shim ïa ka Mobile bad namar ba kim ïasah lang ha kajuh ka ïing kim tip ba u khlem poi ïing ha katei ka miet.

Kiba ha ïing u bah Tailin Lyngdoh Nonglait ki la ong ba kim pdiang ba u bah Tailin un pynïap hi ïa lade, namar ka met jong u ka la jngem lut bad ki ben bad ka duli hapoh dukan ruh ki la kyllon bad katkum ka jingpeit thuh la sngewthuh ba ka la don ka jingïakhun shwa ba un shah sdien phasi. Na shabar ka dukan la lap ïa ka jaiñ sem jong u, ka jaket, ki juti, ka wait, ki maw bad u bulb light ba la law na baranda ka dukan.

U sordar ka shnong permadan u bah W Sohlang ula pynpaw ïa ka jingsngew khia halor kane ka jingjia bad u kyrpad ïa ki bor ka ain ba kin trei shitom ha ka jingtohkit ban lap ïa ka jingshisha.

Ïa ka met u bah Tailin Lyngdoh Nonglait la pynkit noh sha Tirot sing Memorial Civil Hospital Mairang ban leh ïa kaba donkam katkum ka ain bad kiba ha ïing u bah Tailin Lyngdoh Nonglait ruh ki la ujor ejahar ha Mairang Police Station halor kane ka jingjia.