Ka jingjia ha Lapangap dei ka jingkylla ktien ka KAADC

U Myntri Sorkar uba dei ruh u Nongaiktien ka Sorkar MDA u Bah Wailadmiki Shylla hynne ka sngi u la pynpaw ia ka jingsngewkhia halor ka jingbym don ka suk ka saiñ ha ki thaiñ khappud, khamtam ha Lapangap West Jaintia Hills.

U Bah Wailad ula kynnoh ba ka jingbym don ka suk ka sain ha Lapangap ka dei na ka daw ba ka Karbi Anglong Autonomous District Council kaba ju kylla ktien barabor ia ki jingkren bad ki rai ba la shim ha ka jingialang hapdeng baroh arliang.

Haba kren shaki lad pathai khubor u Bah Wailaf ula ong ba ka Sorkar Meghalaya bad Assam na ka por sha ka por ki shimkhia man ka por ban wanrah jingsuk ha kine ki thaiñ.

U Bah Wailad ula ong ba ka jingjia ha Lapangap kam dei shuh ka sien kaba nyngkong, namar ha ki por ba la dep ruh bun ki jingjia ki la jia bad ka sorkar ka la ju iakynduh bad iakren bad ka sorkar Assam.

“Ka Sorkar MDA ka la shimkhia ban pynbeit ia u pud u sam bad na ka 12 tylli ki jaka kiba don ka jingiakajia pud, mynta hynriew tylli na kine ki la lah ban pynbeit, katba sa hynriew tylli pat ki dang sahteng” ula ong.

U Bah Wailad ula kdew ruh ha ka por kaba la dep, ki briew na kine ki thain kim shym la ioh lad ban rep ia ki jingthung jong ki, hynrei na ka liang ka Sorkar ka la shimkhia ban iakren bad ka Sorkar Assam, bad hadien kata ki la ioh lad ban leit sha ki lyngkha.

“Mynta ka kynti ruh ka jingiakren ka dang iaid shakhmat bad ki Deputy Commissioner (DC) bad Superintendent of Police (SP) na baroh ar ki jylla ki don hapdeng ka jingiatreilang kaba jan, hynrei ka jingeh kaba hakhmat eh ka long ba khamtam na ka thain Karbi Anglong, bad khamtam eh na ka liang ka Karbi Anglong Autonomous District Council, ki ba ju kylla ktien barabor ia ki jingkren bad ki nongrim jong ki kumba ka la jia ha Lapangap” ula ong.

U la iathuh ba naduh kaba nyngkong eh bala sdang la sdang ban pynbeit ia ka kam pud kam sam daka jingiakren bad ka Sorkar Assam, ka jingkhmih lynti bad ka jingkular ka long ban pynbeit thik ia baroh 12 tylli ki jaka kiba don ka jingiapher jingmut.

“Kaei kaba ngi thmu bad pynbeit ka long ba ngi dei ban pynbeit ia kane ka kam, hynrei kumba phi tip baroh, ka bynta kaba shitom eh ka long ban shim ia ka rai khamtam bad ki briew kiba shong kiba ha kito ki thain pud. Kam long kaba suk, hynrei ka Sorkar ka don ka jingkular kaba skhem bad kan iai bteng ban iakren, bad ka jingngeit jong ngi ka long ba lada ngi shong bad iathir iakren sani, ngin sa lah ban wanrah ia ka jingpynbeit kaba biang” u la ong.