Ïoh shatri ka Little Flower na ka Umpohliew Society

Ka Umpohliew Society kaba dei kawei na ka kynhun trei mon sngewbha kaba dang shu mih thymmai ha ka shnong Malki, ka la leit ban ai sngewbha da ki shatri na ka bynta baroh ki khynnah skul, ki nonghikai bad ki nongtrei jong ka Little Flower Secondary School.

Ia kane ka kynhun la ialam da u bah Embhah Syiemlieh uba dei u Chairman, bah Hilarius Kharbihkhiew uba dei u Secretary, bah Sainpyniar Mukhim uba dei u Publicity Secretary, bah Khraw Lynshing uba dei u adviser ryngkat lang ki nongkitkam bad ki dkhot jong ka Umpohliew Society.

Kane ka society kadei kaba la seng kyrpang ha shnong Malki, ban peit bad ban kner ki jingiarap kyrpang na ka bynta kiba duk, kiba donkam bad ha kaba iadei bad kino kino ki kam iarap sngewbha hapoh shnong.

Ka Principal jong ka skul, ka Sr. Meris stella dkhar ka la ai khublei ia kane ka kynhun kaba la lah ban iarap ha la i jong i bor sha ki khynnah skul namar kiba bun na ki, kim don ia ki shatri bad ki bun ruh kiba wan na ki longiing kiba jynjar.

U bah Embhah haba ai jingkren u la ong ba kane ka dei tang ka kam iarap sngewbha na ka bynta ki khynnah skul namar ha kum kane ka aiom lyiur, ki khynnah ki donkam ia ki jingiada na u slap bad watla kane ka dei tang kaba rit, hynrei kan long ka nuksa pat na ka bynta ki khynnah ban iarap markylliang.