Urlong ka jingkynriah ia ka Meghalaya Battalion NCC na Shillong sha Tura

U Myntri Rangbah ka Jylla u Conrad K Sangma hynne ka sngi ula plie ia ka Complex jong ka 41 Meghalaya Battalion NCC ba thymmai ha Cherangre, Tura. Haba kren ha ka jingialang, u Conrad Sangmma ula kdew ka bynta ba kongsan ka NCC ban pynrung ia ka jinglong don akor bad ryntih, ka jinglong nongïalam, ka mynsiem ieid ri bad ka jinglong shimet ki samla. Ula shim kane ka jingplie kaba kongsan bad ka jingpynkynriah bad ka jingbuh ïa ka Battalion ha Tura ka long ka jingphohsniew kaba la urlong. U Myntri Rangbah ula iathuh ha ki por mynshwa u don ka jingangnud ban rung kam shipai bad hadien ula angnud ban long u Heh Pulit, namar ka jingdon akor bad burom kaba don ha ki ‘rang bad ‘thei ryngkat ka uniphom.

“Ka NCC ka wanrah ka jinglong ryntih ka mynsiem ieid ri, ka jingtrei shitom ryngkat ka akor ka burom ban pynwandur ia ki samla sha ki nongshong shnong ba don jingkitkhlieh” la ong u Conrad bad ban jur ka synshar khadar kaba pynleit jingmut ia ki samla sha ka roi ka par ka shong ym na ka jingpynlut ia ka pisa lane ki jingtei hynrei ka jingdon ki jingim kiba kylla. Ka 41 Meghalaya Battalion NCC ka dei ba sdang na ka jingpynkha ia ka 15 Assam Artillery Battery NCC ha ka 3 tarik Jylliew 1961 bad la pynkiew kyrdan ïa kane ka Unit sha ka 41 Meghalaya Battalion NCC ha u Risaw 2020. Ka battalion ka kitkhlieh ïa ki kam hikai NCC ha ki 5 district ka Garo Hills. Hapoh ka Border Area Expansion Plan, kane ka Unit ka la pyniar ka jylli na ki 3 tylli ki college bad 6 tylli ki skul sha ki 7 tylli ki college bad 18 tylli ki skul bad ka battalion mynta ka don 7 Company bad 1,120 ki Cadet bad 24 ngut ki Troop bad kumba 2,400 Cadet haduh u Iaiong 2026.

Ka jingpynkynriah ïa ka battalion na Shillong sha Tura ha ka 3 tarik Lber 2026, ka la urlong namar ka Sorkar ka ai ïa ki ïing bad ka jaka ban pynheh ïa ki jingtei bad ki jingdonkam ka Unit. Ha kane ka jingialang la sdang da ka jingpdiang burom ia u Myntri Rangbah, pynbud da ka ‘Guard of Honour’, ka jingsoi ia ka Visitor Book, ot ribon bad ka  jingpyllait paidbah ia u maw kyrteng bad ka jingthung dieng. Nalor kane la ioh ruh ia ka Prayer Dance da ki NCC, ka jingiathuh khana ia ki jingshem da ki dkhot barim, ka jingpynkup burom ia ki Cadet bad ka jingpyni ia ki riti dustur.