18 tarik jylliew ka ilekshon MP Rajya Sabha, ki kyrtong dei ban pyntip ia ki kam bym man:CEO

Ka ilekshon ban jied ia u MP Rajya Sabha ha Meghalaya kan long ha ka 18 tarik Jylliew, ka jingthep vote kan long naduh 9 baje mynstep haduh 4 baje janmiet katba ka jingniew vote kan long por 5 baje janmiet ha kajuh ka sngi. Ia kane la pynbna da u Chief Electoral Officer (CEO), u Dr BDR Tiwari hadien ka jingialang bad ki seng sain pyrthei ban iathir ia ki rukom pyniaid ia ka ilekshon ba shisien ha ka ar snem. Kane ka ilekshon la pynlong ban pyndap ki jaka ba lait thylli ha ka 21 tarik Jylliew, 2026. “Ngi la shong jingialang bad ki sengsain pyrthei ban pynshai halor ka jingpynlong ia ka elekshon Rajya Sabha shisien ha ka ar snem hapoh ka Jylla Meghalaya, namar ka samoi treikam u MP Rajya Sabha kan ban kut ha ka 21 tarik Jylliew. Kumta donkam ban pynlong ia ka elekshon la kumno kumno hapoh ka 20 tarik Jylliew” la ong u Dr.Tiwari. Haba pyntip ia ka por ba la buh da ka Election Commission India ula ong, ia ki jingpynbna yn sa pynmih ha 1 tarik Jylliew ia ki rukom pyniaid ia ka ilekshon. Ki bor pyniaid kin la leit peit ia ka jaka pynlong elekshon ha ka Iing dorbar Thaw Ain ha ka step sngi Nyngkong.

“Ngi la leit jurip ka jaka ryngkat ki ophisar ka Meghalaya Legislative Assembly bad ngi la lap baroh ki biang katkum ki kyndon ba la bthah da ka ECI,” la ong u CEO bad ula batai ia ki kot ki sla ba hap pynbiang da ki kyrtong.“Ngi la batai ia baroh sha ki seng sain pyrthei ba ia dei bad ka jingthep kyrteng kynthup ka jingaiti ia ka Form 2C, affidavit ha ka Form 26, Security Deposit, Form A bad Form B lada dei u kyrtong ka seng sain pyrthei kynthup ka kyndon ba ia dei bad ka For C1 haduh C 8” ula ong. Ula batai ka jingdonkam ki kyrtong bad seng sain pyrthei ki dei ban ki jingtip lada don ki kam bym man ba ki la shah pynngat teng katkum ka jingbthah ka Iing kashari ka Supreme Court bad jingthah ba la pynmih da ka ECI. Haba batai ia ka rukom thep vote, u Dr Tiwari ula ong “Ka rukom pyniaid ia ka elekshon kan long da ka open ballot hapoh ka Representation jong People Act 1951 kaba la dep batai sha ki seng sain pyrthei”.

U la pyntip ia ki notice ka jingialang la dep ban phah lut sha baroh ki seng sain pyrthei hynrei ki don katto katne ki bym shim la wan ia shim bynta. “Ngi la pyrshang ban iakren bad ki lyngba ka phone, hynrei namar ba ki don ki kam shawei, kim shym la lah ban wan iashim bynta” ula ong. Halor ka elekshon Lok Sabha, u CEO ula ong “Ka elekshon kan sa long hadien ba ka ECI ka la pynbna ia ka tarik. U la pynthikna ka jinglong ba la khreh ban leh ia ka Special Intensive Revisson jong ka electoral roll. “Ki nongtrei elekshon ki long ba la khreh beit. Namar la dep pynbna ia ka tarik ka SIR na bynta ka Jylla Meghalaya, ngi la long ba la pynkhreh ban leh ia ka SIR hapoh ka Jylla” ong u Dr Tiwari.