Bajot rathai ka surok Nongkhnoum Khang tih shyiap ha Wah Kynshi, yn pyllait ei ia ki nongwan shangkai

Ka Kur Ïawlar na ka shnong Diengsyiang hapoh ka jingïalam u Bah Micheal Ïawlar, Secretary ka Kur Ïawlar 6 Kpoh, mynta ka sngi ka la leit ban pynsangeh ne khang shuwa shipor ïa ki nongtih bad nongkit shyiap na ka Wah Kynshi ha Nongkhnoum, na ki katto katne ki jaka kiba dang hap hapoh u pud u sam ka shnong Diengsyiang, kawei na ki shnong ha ka thaiñ Nongkhnoum, Nongstoiñ, West Khasi Hills District. Ka Kur ka la kynnoh ba ka daw jong katei ka rai ka long namar ka jingsniew lut jong ka surok ha shi lynter naduh ka shnong Nongjyllieh ter ter haduh ka Madan Ñiamlang, kaba long ruh ka jaka pynïeng kali jong ki nongwan jngohkai pyrthei. Ïa katei ka rai la shim hadien ka jingïalang paidbah jong ka Kur kaba la long ha shnong Diengsyiang.

Ym tang katta, hynrei ka Kur ka la khang ruh ïa ka khyrdop lum pisa na ki nongleit jngohkai sha katei ka thaiñ, da kaba pynbna ba yn pyllait ei shipor ïa ka bai rung tad haduh ban da lah pynbeit biang ïa ka surok bad ïa kiwei pat ki jingeh kiba mih. Ha katei ka sngi, ka Kur ryngkat bad ki longkmie, ki rangbah bad ki samla shnong, kumjuh ruh u Bah Banteiborlang Marweiñ, Shongknor ka Hala Tynrai Eco Tourism Co-operative Society Ltd., Nongstoiñ, ki la pynpaw ïa ka jingsngewkhia halor ka jingsniew palat ka surok kaba la ktah jur ïa ka kam jngohkai pyrthei ha katei ka thaiñ.

Kumta, naduh mynta ka sngi, ka Kur Ïawlar ka la mana ïa ka jingtih bad jingkit shyiap na katei ka wah bad ka la pynbna ruh ba yn pyllait ei shipor ïa ka bai rung na ka bynta ki nongwan jngohkai pyrthei kiba ïaid lyngba ka shnong Diengsyiang. Haba ïa dei bad katei ka bynta, ka Kur ka la leit ruh ban ai da ka jingthoh sha ki nongshim wai ïa ka parking bad sha ki nongtih shyiap ha katei ka thaiñ. Ha kajuh ka por, ka Kur ka la leit ruh ban ai da ka jingthoh sha ka Deputy Commissioner ka West Khasi Hills District, ka Hema Nayak, IAS.