Ka ktien Khasi kawei na ki ktien hapoh ka Ri ba dawa pynrung ha ka Khyrnit ba Phra

Ka ktien Khasi ka dei kawei na kiba bun ki ktien ki thylliej hapoh ka Ri kiba dawa pynrung ha ka Khyrnit ba Phra jong ka Riti Synshar ka Ri India.
Ïa kane la pyntip da u President ka Khasi Author Society (KAS), u Dr DRL Nonglait hadien ka jingiakynduh ïa u Myntri ka tnat kam pohiing ka Sorkar Pdeng u Amit Shah bad ula iathuh ba ka Sorkar India kala shimkhia bha ban bishar ia ka jingdawa.
Haba kren shaki lad pathai khubor u President ka KAS, u Dr DRL Nonglait ula ong “Ka dei tad hynin ka miet ba ngi la ioh jingtip na ka Ophis u Myntri Rangbah ka Jylla ba u Myntri ka tnat kam pohiing ka Sorkar Pdeng u Amit Shah ula wan sha Shillong. Ngi la kyrpad ia ka Ophis u CM ban pynioh por lem ban iakynduh bad ngi sngewnguh shikatdei eh ba ngi ka ioh iakynduh ia u”.
U Dr Nonglait ula iathuh baka KAS kala pynkynmaw ruh ia u Amit Shah ia ka jingiai tynruh jong ka ban ioh jingithuh ia ka ktien Khasi.
“Ngi la pynkynmaw ia u ba ngi la aiti ia ka dorkhas ba nyngkong ha u Kyllalyngkot 2021 bad iakynduh ia u hangne ha Shillong ha u Naitung 2021” ong u Dr Nonglait.
U bynrap ba kila batai bniah ia u Amit Shah halor ka jingithuh ka Sorkar Jylla ia ka ktien Khasi kum ka Official Language. “Ngi la pyntip ha u ba ka Khasi kala long kawei na ki Official Language ka Meghalaya lyngba ka Meghalaya Languages Ordinance 2026, bad kyrpad ia u ban shimkhia bha ia kane ka kam bad, lada long kaba lah, ban wanrah ia ka bill ka Sorkar ha Parliament”.
Kat kum ka jingong u Dr Nonglait, u Amit Shah ula mynjur ia ka jingbun jong ki jingdawa. “Ula iathuh ha ngi ba ki don bun ki ktien ba dawa pynrung ha ka 8th Schedule bad ong ba ka Sorkar kala shimkhia bha ia kane ka kam. Ka Ministry kan sa khmih ia kane” ula ong.
“Ula pynpaw ruh ba ka ktien Khasi ka dei kawei na kiba bun ki ktien kiba la don ha ka thup” bynrap u Dr Nonglait.
“U khlem pynpaw ia ka por, hynrei u Amit Shah ula kular ia ka kynhun ba kane ka kam kala don hapoh ka jingbishar” ula iathuh