Ïakynduh u Dr. Mansukh ïa u Lat ka jylla

U Myntri ka Sorkar Pdeng uba khmih ia ka Labour & Employment and Youth Affairs & Sports u Dr. Mansukh Mandaviya hynne ka sngi Saitjain ula leit iakynduh ia u Lat ka Jylla u CH Vijayashankar ha Lok Bhavan, ha ryngkat ka jingdonlang u Additional Chief Secretary sha u Lat ka Jylla u HC Chaudhary.
Ha kane ka jingiakren, u Lat ka Jylla bad u Myntri ka Sorkar Pdeng kila iatai sani halor ki mat ki bapher bapher kiba iadei bad ka roi ka par bad ka jingiaid shaphrnag jong ka jylla Meghalaya. Ki la iatai ia ka jinglah ka jylla kum kata ka jaka kaba biang bha ha ka kam jngohkai pyrthei bad ka banjur ia ka jingdonkam ban kyntiew ia ka Meghalaya kaba don ia kai jaka bad ki sawdong sawkun kiba itynnad, ka jingriewspah ka kolshor naduh kulong kumah bad ki lad kiba iadei bad ka kam jngohkai kaba iadei bad ka mariang.
Ki la phaikhmat ruh halor ka jingdon ka Meghalaya ia ki jingthaw bad ia ki jait jingim kiba long kyrpang bad ka jingiar ha kaba lah ban leh ia ki jingwad bniah, ban pynneh pynsah bad ban pyndonkam ia ka spah bah jong ka jingdon ia ki kynbat kiba lah ban ai jingsumar.
U Lat bad u Myntri ka Sorkar Pdeng kila pynpaw ruh halor ka jingkongsan ban pynneh pynsah ia ka jinglong jingman bad ia ka sawdong sawkun ha ryngkat bad ban thaw ia ki lad ki lynti ban kamai kajih bad ban kyntiew ia ka ioh ka kot lyngba ka jingstad saïan bad ki jingleh kiban pynneh pynsah.
Nalor kane, kila ia sam ruh mar kylliang ia ki jingpynsngew ha kaba iadei bad ka jingpynkup bor ia ki samla, ka jingkyntiew ia ki sap ki phong, ban kyntiew ia ka kam ialehkai, ban thaw ia ki lad ban aikam aijam bad ia ki sienjam kiba thmu ban wanrah ia ka jingroi kaba salonsar bad ban pynbha ia ka rukom im jong ki paitbah ka jylla Meghalaya.
Ki la pynpaw ruh ia ka jingdonkam ban donlang ia ka jingkitkhlieh na ka bynta ban pynkhlain ia ka jingiatreilang hapdeng ka Sorkar Pdeng bad ka Sorkar Meghalaya ha kaban pynurlong ia ka jingiohi jngai jong ka roi ka par kaba iaineh, ka jingkiew ka ioh ka kot bad ka jingkyntiew ha kaban plie ia ki lad na ka bynta ki samla.
U u CH Vijayashankar ula pynpaw ruh ka jingsngewnguh ia u Myntri ka Sorkar Pdeng halor ka jingai jingkyrshan ban kyntiew ia ka roi ka par ka jylla Meghalaya bad ula kitbok ia u Dr. Mandaviya ba un seisoh ha ki jingpyrshang ki jongu ban kyntiew ia ka bha ka miat jong ki samla ha ka ri baroh kawei.