Ryngkat ka T.5 lak bad kular jingker, plie u Dy. CM ïa ka Rilang College, Mawsaw

U Deputy Chief Minister ka Jylla ba dei peit ia ka tnat Pynroi Sor, u Bah Sniawbhalang Dhar ha ka Sngi Saitjain u la plie paitbah ia ka Rilang College, Mawsaw kaba do ha ki thaiñ Shiliang Um Rilang jong ka South West Khasi Hills District.
Ia kane ka Rilang College la tei lyngba ka jingshim jingkitkhlieh jong ka Rilang Education Society (RES) hapoh ka jingialam u Bah Renikton L. Tongkhar, MLA ka thaiñ bad President ka Governing Body. Ka Rilang College kaba la ioh ia ka kyrteng lyngba ka jingai jingmut u Bah Commander Shangpliang, President ka Hills Farmer Union (HFU), ka la buh ia ka 28 tarik Rymphang kum ka “Foundation Day”, kaba dei ruh ka sngi kha jong u MLA ka Mawkyrwat, Bah Renikton L.Tongkhar.
Ka jingplie ia kane ka kolej ka la long shisha ka jingkyrkhu ïa ki samla pule jong ka thaiñ Shiliang Um kiba la pyndep ïa ka Matrix ha kaba kim donkam shuh ban leit pule sha ki jaka ba kham jngai.
Haba ai jingkren, u Deputy Chief Minister, Bah Sniawbhalang Dhar u la ai khublei kyrpang ia u Bah Renikton halor ka jingiohi jngai jong u ban tei ia kane ka College, bad khamtam ka jinglah jong u ban pynsngewthuh ia ka Kur Iawphniaw ban ai ei ia kane ka jaka baheh ban tei ia ka College bad ban lum ia ki riew rangbah ka thaiñ kat haduh ba ki la rai ban bei pisa na ka bynta kane ka College.
Kum ka dak jong ka jingdonktilang ban kyrshan ia kane ka shlem ai jinghikai, u Deputy Chief Minister u la noh synñiang ruh T.5 lak tyngka bad u la kular ruh ba un sa ïarap ban pynioh skhim na ka bynta ban tei ia ka jingker (fencing) ha baroh sawsong jong ka kolej kaba don kumba 600 metre eiei.
Ha kane ka sngi la iadonlang ruh u MLA ka thaiñ, Bah Renikton L Tongkhar, uba long u President ka Governing Body, kong A.L Mawlong , Deputy Commissioner, SWKHD , bah B .Jyrwa , Superintendent of Police , u Dr. K.K. Nongsiej, Secretary ka Governing Body, u President ka HFU, Bah Commander Shangpliang lem bad kiwei kiwei de kiba dei ki ‘founding members’, ki samla pule bad nonghikai ka college, bad kumjuh ki khynnah skul bad paitbah ka thaiñ.