Hiar dor u synsar haba ïanujor bad ki bnai ba la dep

Uwei na ki Marwari thied synsar ha Iew Dielang kaba don ha Mawiong, ula iathuh ba ka iew synsar mynta ka hiar dor kumba 10 percent eiei haba nujor bad ha ki bnai ba ladep. Ha ka jingiakren bad une u Marwari, ula iathuh ba ka iew synsar ka kylla na ka por sha ka por ha kaba teng teng ka hiar bad teng teng ka kiew.  Ula iathuh ba ha ki bnai ba ladep u synsar ba bha u poi dor T.60 shi kilo katba mynta u por tang T. 54 shi kilo bad bynrap ba kane ka jinghiar dor jong u Synsar ka dei namar ba ka khlain ka jingpynmih katba ka duna ka jingdawa bad kane ka la pynkynduh jingeh ruh ia ki ban pyniaid ia ka iew Synsar.

Katkum ka jingiathuh une u Marwari ka dor synsar mynta uba shi nombor u poi T. 54 ne 55 shi kilo, uba ar nombor ulong  T. 44- 40 shi kilo bad uba lai nombor u long  T.30 shi kilo. Katba ha ka jingiakren bad ki katto katne ngut ki nongrep synsar, ki la pynpaw ba ka jinghiar dor jong u synsar ka la buh jingeh ia ki bad kila pynpaw ruh ka jingbynniaw namar ba ka skhim CM ASSURE jong ka Sorkar ka treikam tang ha u snem ba ladep. Kum ban shu pynkynmaw ba kane ka skhim CM ASSURE la wanrah da ka sorkar jylla mynshem snem ha u 2025 kum shi bynta ban iarap thied ia ki synsar na ki nongrep haba hiar dor ka iew.

Ki nongrep ki la pynpaw ba ki la sngewsuk ba don kane ka skhim ban iarap ia ki haba hiar dor u synsar, hynrei mynta haba hiar dor u synsar ym shym la iohi ban treikam kane ka skhim.“Ka jingdon kane ka skhim ka kham pynmyntoi namar ka dor ka kham heh, ki nongthied ruh ki wan shim hi ia u mar na shnong bad kaba pynsuk shibun ka pisa ruh ka poi ha ki bank account hynrei ngi sngewdiaw ba kane ka skhim jong ka Sorkar, ha une u snem ba hiar bha ka dor synsar kane ka Skhim ka la jah bad khlem treikam shuh,” la pynpaw ki nongrep.