Sam pata u MR ia ki nongshong shnong ba sah ha jaka sorkar

U Myntri Rangbah ka Jylla u Conrad K. Sangma hynne ka sngi, ula sam ia ki pata jaka (Land Patta) sha ki nongshong shnong jong ka Ronggi Songgital ha ka thain Tura, da kaba pynurlong ia ka jingdawa kaba la slem bah jong ki paitbah katei ka thain.

Ia kine ki pata jaka la aiti sha kito kiba shong basah ha ka khyndew jong ka GAD. Ki don kumba 8 tylli ki shnong ha Tura, ha kaba ia ki kot ki sla jaka lah dep ban sam sha ki 4 tylli ki shnong.

U Myntri Rangbah ula pynkynmaw ia ka jingleit ka jongu sha kitei ki shnong ha u snem 2018, ha kaba ula kular ia ki paitbah ba un trei shitom ban pynurlong ia ka jingdawa kaba lah slem ka jongki.

Ula ong, ba ka jingsam ia ki pata jaka ka dei ka jingpynurlong ia ka jingkular bad pynpaw ia ka jingkmen halor ka jinglah ban pynurlong ia ka jingkular kaba ula khlei sha ki paitbah.

“Ki don baroh 21 tylli ki pata jaka kiba la sam sha ki nongioh jingmyntoi ha katei ka prokram”.

Ki nongioh jingmyntoi kila pynpaw ia ka jingkmen bad jingsngewnguh bad ka ong ba ka jingioh pdiang ka jongki ia ki pata jaka kala ailad ia ki ia ka jingshngain kaba khraw bad ka jingithuh ia ka hok halor ka khyndew ka shyiap.

U Myntri Rangbah ula kular ruh ba ha kiwei ki shnong ruh yn ialeh ban pynbeit noh ia ki jaka bad ka sorkar kan iaid shakhmat tang lada ioh ia ka jingmynjur bad jingiatreilang jong ki paitbah bad kan ym shim satia ia kano kano ka rai kaba nalade hi.

Ha kane ka jingialang la iadonlang ki heh ophisar ka District, ki nongialam shnong, ki nongioh jingmyntoi bad ki nongshong shnong.