Nga kmen lada ki MLA ka UDP ki wan rung sha BJP : Sanbor

U Nongialam ka BJP u Bah Sanbor Shullai ula ong, ba ula shu iohi tang ha ki lad pathai khubor shaphang ka jingsaphriang ki khubor ba ki MLA ka UDP ki thmu ban rung noh sha ka seng BJP bad un dap da ka jingkmen lada ki MLA ka UDP bad na kiwei kiwei ki seng kin wan ban pyniasoh noh bad ka BJP.

“Ngam don jingtip eiei shaphang ka jingthmu ki 9 ngut ki MLA ka UDP ban rung sha ka BJP, nga lah shu iohi tang ha ki kot khubor bad ki lad pathai khubor ba kila leit sha Delhi ban iakren bad u Myntri Kam Pohiing ka ri u Amit Shah bad kane kadei kaba ka pyrthei baroh kawei ka tip. Ngam don jingtip eiei ba ki mut rung BJP namar ba kim shim la wan satia ban iakynduh bad nga” ong u Bah Sanbor Shullai uba long ruh u Myntri ka Sorkar Jylla.

U Bah Sanbor ula ong, “Ngan dap da ka jingkmen, lada jia ba ki MLA na ka UDP ne ki MLA bad ki MDC na kiwei kiwei ki seng saiñ pyrthei, ne ki Nongialam sengbhalang bad ki riewpaitbah ki wan ban pyniasoh sha ka BJP. Ngi kum ka BJP ngin pdiang sngewbha ia ki sha ka party”.

Ula ong ruh, ba ka long kaei kaei kaba sngewtynnad haba ula ioh ia ki jingpyntip na ki nongialam jong ka seng, ba bun ki paitbah kila wan ban pyniasoh noh sha ka seng BJP bad kumta ki nongialam ka BJP kin ialeh ban trei shitom ban nang pynkhlaiñ shuh shuh ia ka seng hapoh ka jylla Meghalaya kaba dei ruh ka jingbthah jong ki nongialam jong ka BJP ha ka ri.