Palat 2 hajar la kyntiew kyrdan ia ki skul, sam khusnam u MR ia ki nonghikai skul

Kum shibynta ka jingrakhe lypa ka sngi ki nonghikai ne ka Advance Teachers Day ba 65, u Myntri Rangbah ka Jylla Conrad K Sangma ula sam khusnam State Teachers’ Awards bad District Teachers’ Awards 2026, Best Scout Master & Guide Captain Awards ryngkat ka song tyngka hapoh ka Teachers’ Welfare Fund ha ka jingialang hynne ka sngi ha Tura.U Myntri Rangbah ula ai khublei ia baroh ki nongioh pdiang ia ki khusnam bad ong, ka jingai jingithuh kam dei satia tang ia kito kiba ioh pdiang ia ka khusnam mynta ka sngi hynrei kadei ruh kumjuh ia baroh ki nonghikai kiba hikai marwei ha ka skul ha ki shnong ha khappud, kiba la leh ia kam khlem da don ia ki nongpeitkai, khlem ka jingioh jingaroh ne jingthapkti, namar ba ki khynnah ki shaniah ha ki.Ula ong “Ym don satia ki rukom pyniaid ia ka pule puthi kaba lah ban long halor ka jinglah treikam jong ki nonghikai, kam pher watla katno katno ngi theh pisa ban pynlut ha ki jingtei ne katno tylli ki skhim kiba ngi lah pyntrei”.

Haba pynkynmaw ia ka jingiaid lynti naduh u snem 2018, ula ong, ula pan ia ka buit treikam ban wanrah ia ki jingkylla ha kiba iadei bad ki jingtei jong ki jaka pule bad ha ka jingpyni bniah la donkam haduh T.3000 Klur.“Nga la peit lyngngoh ia ka ‘Screen’ bad ong, ba ngam don T.3000 klur. Hynrei Nga la ong pat, to ngin ia sdang, watla ka long shwa tang ia 10 tylli ki skul. Ha man la ki jingiaid lynti kiba jrong, ka sdang da kaba shim ia ka sienjam kaba nyngkong”.Hadien 7 snem, lyngba ka Mission Education, ka Sorkar ka la lah ban kyntiew kyrdan ia palat 2000 tylli ki skul Elementary ka Sorkar bad pynbun ia ka jingdon ki skul Higher Secondary na ka 427 sha ka 545 tylli da kaba wanrah ia ka jingpule kaba don kyrdan kaba iajan bad man la ki iing ki sem jong ki khynnah pule. Na ka Chief Minister’s Special Development Fund (CMSDF), kaba bun eh kala leit sha ka pule puthi, kumba T,150-180 Klur na ka T.300-400 Klur kaba la pynlut ha ki 8 tylli ki snem ka mang tyngka.  Lyngba ka Tnad Pule Puthi, T.600-700 Klur lah dep ban pynlut, nalor ka pisa jong ka CSR kaba la pynwan na ka bynta ka pule puthi baroh. U Conrad ula pyntip ba ha ka sien kaba nyngkong, ka Meghalaya kala thaw rekod naduh ba lah sdang ban pyntreikam ia ka Performance Grading Index, kaba kiew na ka Akanshi-3 sha ka Akanshi-1, da ka jingioh Score ba kiew na ka 448 sha ka 525.5 na ka 1000. Kane ka jingkiew kaba 77.7 point hapoh jong ka shi snem jong ka jinglah ban lehbha kaba la don rekod da kano kano ka jylla hapoh ka ri bad ka jingioh jingmyntoi kaba 124 point (31%) ha ki saw snem kiba ka dep.

Kane kala pyni ruh ia ka jingsesisoh kala ktah ia man la ki longiing kaba long 97.2% ka jingpass ki khynnah pule ha ka SSLC, 86.6% ha ka HSSLC mynta ka snem, ka jingwanrah ia ka jingkylla na ka Klas X bad XII kala kiew sha ka 82 percent kaba la tam palat ia ka jinglong jingman ha ka ri bad ka jinghiar kynsan ha ka jingieh noh shiteng ia ka jingpule ha ka Secondary. Ban jam palat ban ia ka jingioh ia ka jingkamai (Score) ha ka jylla, ka sorkar kala thaw ia ka Meghalaya School Performance Grading Index (MSPGI) kaban kynthup ia baroh 11,443 tylli ki skul ha kylleng jong ki 12 tylli ki district, kaba la ioh ia ki lad ha ki 5 tylli ki Domain bad 43 tylli ki Indicator kaba la buh ia ka 1000 point. Ka skul kaba la ioh ban kamai bun point tam kadei 930 point. Ka East Khasi Hills ka don 48 tylli hapoh jong ki Top 100 Schools bad ka Ri Bhoi 16 tylli. Ha Garo Hills, ka West Garo Hills kala lamkhmat da ka jingdon 9 tylli ki skul hapoh jong ka Top 100 ha ka jylla, 11 ha ka Top 100 Government Schools bad 7 ha ka Top 100 Private Schools. Ki jaka pule kum ka Montfort PM SHRI LPS, Montfort Higher Secondary School, Dalu Govt PM SHRI Hr. Sec, Shyamnagar Govt PM SHRI School bad ka Tura Public School kidei kiba donlang ha ka thup Top Performers.Kaba ioh ban kamai bha ia ka Score, ka East Garo Hills 838, South Garo Hills 808, North Garo Hills 775, South-West Garo Hills 752, West Garo Hills 892. “Ka MSPGI kam dei satia tang ka Scoreboard ban jop ne rem, hynrei kadei ka map kaba batai ba man la ki nonghikai bad ki skul ba kin leh na ka bynta u snem ban wan” ula ong.