T.4,444.43 klur ba ai ka sorkar ka dei ba shim ram na ki Agency:HYC

Ka Hynniewtrep Youth Council (HYC) ka la kyntu ia ka Public Accounts Committee (PAC) jong ka Meghalaya Legislative Assembly ban khmih bniah haba iadei ka kam pisa tyngka ba la kdew ba ha kaiphod jong ka CAG halor ka mang tyngka ka jylla na bynta u snem mang tyngka 2024-25.

U President ka HYC u bah Roy Kupar Synrem ula ong ba ka seng ka la phah jingthoh sha u Chairperson ka PAC ban pan jingpynshai haba iadei bad ka jingpyllut ka sorkar ha ki 22 tylli ki State Public Sector Enterprises (SPSEs).

Ula ong ba katkum ka jinglap ka kaiphod CAG, ka sorkar ka bei pisa haduh T. 4,444.43 klur ha ki kompeni bapher bapher kane ka long haduh ka 31 tarik Lber, 2025, hynrei ha ka kaiphod jingiohnong pat ha u snem 2024-25 ka long tang T. 0.20 klur.

“Kane ka T.4,444.43 klur kam dei ka pisa ba ka sorkar da lade ka ai hynrei ka dei ba ka shim ram na kiwei ki Agency bad ka hap ban siew sha ki ryngkat ka sut. Kane ka jingbuh pisa kaba sorkar ka leh ka long tang ban pynduh nong ia ka pla tyngka ka sorkar bad ia ki paidbah,” ula ong.

Ha kajuh bah Roy Kupar ula pynpaw ka jingsngewkhia namar ba ka sorkar ka bei shuh sa T. 467 klur ha u snem 2024-25 watl a kam shym la don ka jingioh nong.

“Ka seng ka kwah ban tip kaei kaba pyllong ia ka sorkar ba nalor ba ka iohi ba ym don jingiohnong eiei hyrnei ka dang ai shuh shuh ka pisa sa T.467 klur bad ngi kwah ruh ba ka PAC kan tip ba kane ka pisa kaba la pyllut tam ka shim naei,” ong u bah Roy.

Ula ong ba ka seng ka la kyrpad ia ka PAC ban tohkit ia ki rukom treikam jong ki SPSEs bad ka la dawa ruh ban khmih bniah lada don kano kano ka jingbym lah ban bud ia ki rukom treikam paidbah.

Shuh shuh ula ong ba katkum ka kaiphod ka CAG wat ki SPSE kiba iohnong ruh kim shym la siew eiei sha ka sorkar bad kane ka jia namar ba ka sorkar kam don ia kano kano ka poilisi ka ban kdew ba ki SPSE lada ki iohnong kidei ban siew sha ka sorkar.