Ai jingkyrshan ka AJMDWU ia ka rai sangeh shet ja sngi ha ki skul

Hadien ba ka Union of Cook cum Helpers PM Poshan Meghalaya, Shillong ka la pynbna ia ka rai iakhih sangeh leit shet ja sngi haki skul na ka daw bym sngap ka sorkar kmie ia ka jingdawa jong ki na ka central share sha ka 9000 tyngka na kaba ka juh ai 900 tyngka shibnai, kumta na ka liang ka All Jaiñtia Mid Day Meal Workers Union AJMDWU ne ka seng ba shet ja sngi ha ki skul ha ka jingialang ha ka 1 tarik mynta u bnai ha Iungwalieh Loomiongkjam Jowai, ki la shim ka rai ban iasnoh ktilang bad kyrshan pura da kaba sangeh leit shet ja ha ki skul.

U President ka All Jaiñtia Mid Day Meal Workers Union u Jerry Anderson Suting u ong, ka daw ba ki hap sangeh dei namar ba hadien 7 tylli ki snem ba kum ka seng ki nongshet ja sngi haki skul kila phah jingthoh dawa ia kane ka mat wat shaduh u prime minister ka Ri India u Narendra Modi bad kumjuh sha kiwei ki myntri sorkar pdeng ban pynsngew iaki jingeh ba mad ki nongshet ja skul sha kane ka thaiñ naka jingsniew ba ki ioh tang 2000 tyngka shibnai.

U ong ba haka jingshisha kum ka seng kala kyrpad ban pynkiew iaka Central share naka 900 shaka 9000 tyngka shibnai khnang ba kum ki nongshet kin lah ban im bad pyndap pynbiang ia ka ïing ka sem.

Ki kyrpad ruh iaki School Managing Committee, ki nonghikai, ki nongialam haki shnong ki thaw ba kin ai ka jingiatreilang bad ki nongshet ja skul khnang ban long kam ki mat jingdawa jong ki.

Sa kawei ruh u ong, kane kam dei tang ka jingdawa naka bynta ban biang ki nongshet ja sngi haki skul, hynrei namar bala iohi ruh lyngba ka jingiaid beit kane ka skhim ioh myntoi bha ki khynnah skul kumjuh ki longïing ba duk.