Leh Live u Myntri Rangbah ha sla FB ban kyntiew kam jngokai

Katba ka Meghalaya ka dang ialeh ban kynjoh sha ka thong ban don 3000 tylli ki Homestay bad pyrshang ban pynkhlain ia ka kamai ka kajih lyngba ki kam jngohkai ha kylleng ka Jylla, u Myntri Rangbah Conrad K Sangma ha ka sngi Saitjain, ula leh ‘Live’ ha la ka jongka Facebook Page na Smit, kawei na ki shnong ka Meghalaya kaba itynnad bad kaba kongsan bha haba iadei bad ka riti dustur bad ba iatip ia ka pateng ba riewspah bad ka jingdon ia ki jaka jngohkai kiba itynnad.

Ka jingleit jngoh kala pyni lypa ia ki buit treikam jong ka Jylla ban pyniasoh ia ki kam jngohkai, ka sengkam sengkam, ka jingpynroi sap treikam bad ka jingiashimbynta ki shnong ki thaw, haba air uh ia ka lad ban iakren markhmat bad ki nongshong shnong lem bad ki nongkhaii ka thaiñ.

Ha kane ka jingleit sha Smit, u Myntri Rangbah ula pynlut por ban iakren bad ki nongshong shnong, ki nongshangkai bad ki nongsengkam trai shnong ha ka Iew shnong, kynthup ia u trai ka RC Homestay. Hadien ula leit jngoh ia ka Homestay bad iakren bad ki trai iing halor ka jingshem jong ki, ki jingeh bad ki jingangnud.

Hapdeng ka jingiakren halor ka kam jngohkai bad ka khaii pateng, ki nongshong shnong kila pynpaw ia ka jingsngewkhia halor ka kam lum niut, street light bad ka jingbret jakhlia sharud shakiar ha ka thaiñ bad u Myntri Rangbah ula kular ia kito kiba iadonlang ba un sa pyntip ia kine kiei kiei baroh sha ki tnad ba dei khmih.

Ha ka jingiadih sha bad ki jingbam kiba bang jong ka thain ha ka dukan sha harud surok, u Conrad ula pynshlur ia ki nongshangkai ba kin leit jngoh ia ki mariang ba itynnad, ka koshor bad mad ia ka jingpdiang sngewbha ka Jylla.

“Ka long kaba donkam ban pyniasoh ia ki briew ha ki shnong ki thaw. U nongkhmat paidbah um lah ban sngewthuh hok ia ka jingim bad ka jingeh jong ki paidbah khlem da long kiba jan bad ka imlang sahlang” ula ong.

U Trai ka Homestay ula batai ba kumno kine ki jingkyrshan kila pynlah ia ka iing jongu ban pynkha bad pynheh ia kane ka kam. Haba iaroh ia ka jingiaid shaphrang, u Myntri Rangbah ula iai ban ia ka jingkut jingmut jong ka Sorkar ban kyrshan ia ki nongseng kam trai jylla.

“Ki Homestay ki long kiba donkam bha bad kiba kongsan shikatdei eh na ka bynta ka kam jngohkai jong ngi. Lyngba ki Homestay, ngi pynthikna ba ki jingmyntoi ba ngi ioh na ka kam jngohkai kan leit beit beit sha ki longiing bad ki shnong ki thaw” ula ong.

Ka kam jngohkai ka iai long ka mat pdeng jong kane ka jingiakren, ha kaba u Conrad ula pyntip ba ka Meghalaya ia mynta ka don jan kumba 900 tylli ki homestay kiba la treikam, katba sa 2100 tylli la khmih lynti ban sa mynjur shen.

Ka Sorkar kala trei ban thaw ia ka jingiatreilang jong kumba 3000 tylli ki homestay ha kylleng ka Jylla hapoh kine ki 12-18 bnai.

Ka jingiakren kala ktah ruh halor ka Skill Meghalaya Programme kaba la ai jingmyntoi ia jan 30,000 ngut ki samla lyngba ki jingai jinghikai bapher bapher, ka jingkyrshan bala ai lyngba ka PRIME bad CM Elevate Scheme, kumba 200 tylli ki kali la dep ban bei tyngka ban pynioh ia ka lad kamai jakpoh lyngba ki kali, katba 52 ngut ki samla pule kila ioh ia ka jingkyrshan song pisa ba kin leit pule ia ka Hospitality Education ha ka IIHM bad kiwei ki jaka pule. Nalor kane la iakren ruh halor ka jingthmu ka Meghalaya ban pynlong ia ka 39th National Games ha u 2027.