Dawa ka JCMSWA ban plie mardor ïa ka jingtih dewiong ha Rilum Jaintia

Ka Jaintia Coal Owner Miners Supplier and workers Association (JCMSWA) ka la dawa na ka sorkar Jylla ba ka dei ban plie noh mardor ia ka jingtih dewiong ha ka thain rilum Jaintia. U President ka JCMSWA u bah Marshall SB. Biam ula ong ba ka jingkhang ia u dewiong ka la buh jingeh ia ki ha kaba ki la rai ban iakhun tyngeh ban dawa na ka sorkar ba kadei ban plie noh ban shah ban tih dewiong kumba long mynshwa bad khnang ba ki paidbah kin suk. “La 12 snem kynthih ka jingkhang ia u dewiong ka la ktah ia ki nongshong shnong jong ngi ha kaba ban bam ruh ki ioh namar ba kim ioh shuh ban bylla.

Ka jingbym don bylla ka la pyllong ban pynpep skul ia ki khun bad wat tang ban shim dawai ia ki khun ruh kim ioh,” ong u President ka JCMSWA. La kyntu ia ka sorkar ba kan wad ia ki lad ki lynti ban plie biang ia u dewiong kumba long mynshwa.Ula iathuh ba seng ka la buh sngi ban pyllong ia ka jingiakhih, hynrei ka ophis jong u Deputy Commissioner ka East Jaintia Hills District kam shym ai jingbit ban pynlong jingiakhih. Halor kane, ula ong ba na ka liang ka seng kan iaid beit sha khmat ia ka rai ba ha ka 1 tarik Jylliew kan leit tur ha Khmat ka ophis DC East Jaitia hills ban pynlong ka jingiakhih kaba khlem buh por halor ka jingdawa plie noh ia ka Jingtih dewiong.

Ha kajuh ka por, ki la ther ia ki nongmih khmat ha rilum Jaintia ba ki shu wan pynbiej tang ha ka por ilekshon, hynrei ynda ladep ki la aidaw da kumne kumtai. “Tang shu wan ilekshon kila pynbiej da u dewiong ynda ladep pat kila leh klet bad ai daw da kumne kumtai,” ula ong.