Kynnoh ba shah ïalam shah Delhi bad shah pynbor ban trei ïa ka kam khaii met Ïarap pyllait ka KSU

Ka Khasi Students Union (KSU) Delhi Unit hynnin ka sngi ka 31 tarik Jymmang, ka la lah ban iarap ban pyllait ia arngut ki samla kynthei ka jylla Meghalaya na ka nongbah Delhi, kiba la kynnoh ba ki shah ialam ban khaii met ha kawei ka hotel. Katkum ka kyrwoh na ka KSU Delhi Unit, la ong ba ha ka 31 tarik Jymmang, 2026, arngut ki samla kynthei kiba dei na ka shnong Barato, Meghalaya, ki la pyntip sha ka KSU Delhi ban pan jingiarap kyrkieh. Ka seng ka la ong ba kine ki arngut ki samla kila kynnoh ba ki la shah ialam sha Delhi da ka jingkular ban pyniohkam iohjam ia ki ha hotel. Hynrei hadien ba ki la poi ha Delhi, ki la kynnoh ba ki la shah pynbor ban leh ia ki kam dakaid ne ka kam khaii met. Ka KSU Delhi Unit ka la ong ba katkum ka jingiathuh jong kine ki samla, la kynnoh ba kawei ka kynthei kaba ialam ia ki sha Delhi ka la dawa ba kidei ban pynphai noh ia ka pisa kaba ka la pyllut na bynta ka bai leit bai wan jong ki bad ka la khnieh ruh ia ki mobile phone jong ki.

Shuh shuh ki la kynnoh ba ki khlem pyllait ia ki katba kim pat siew ia ka pisa ka ba la pyllut na bynta jong ki ha ka bai leit bai wan. Ka KSU Delhi Unit mar ia iohpdiang ia kane ka phone, mar mar ka la pyntip sha ki pulit ka Delhi ba kin tuklar halor kane ka kam bad ki la shimkhia mardor bad ki la kem ia ka kynthei kaba la shah kynnoh bad kila pyllong ia ka jingtohkit bniah halor kane. Shuh shuh katkum ka jingiathuh ka KSU Delhi Unit, kane ka kynthei ha ka jingtohkit ki pulit ka la kyntait ia baroh ki jingkynnoh pyrshah ia ka bad ka la kam ba kine ki arngut ki kynthei ki wan hi da ka mon sngewbha lajong sha Delhi na bynta ban wad kam wad jam bad ka la kam ba ka la siew na bynta ka bai leit bai wan jong ki, kum shi bynta ban iarap ia ki ban ioh kam. “Kane ka kynthei kala kyntait ba ka don bynta ha kaban pynbor ia ki ne ban pynbor ia kine ki arngut ki kynthei ban leh ia ka kam dakaid,” ong ka KSU Unit. Hadien ka jingtuklar jong ki pulit, la bthah ia kane ka kynthei ban pynphai ia ki mobile phone kaba dei jong ki arngut ki samla kynthei.

Ia kine ki arngut ki khynnah kynthei, ki pulit ka nongbah Delhi kila aiti noh sha ka KSU Delhi Unit bad mynta kine ki don hapoh ka jingiada jong ka KSU bad ka seng ka dang pynkhreh ban pynbiang ia ki jingdonkam ban pynphai suk ia ki sha la iing. Ka seng ka la iathuh ba ki bahaiing hasem jong kawei ka kynthei , kiladep pynkhreh bad pynbiang ia ka pisa bad kan sa leit phai noh lashai ka sngi sha la ka jylla. Na ka liang ka KSU Delhi Unit ka la ieng skhem halor ka nongrim ban iada ia ka bha ka miat jong ki khynnah bad ki samla ka jylla kiba sah shabar ka jylla bad ka la kyntu ruh ia baroh ki samla kiba wad kam wad jam, ba kidei ban husiar ha shwa ban pdiang ia kano kano ka jingtyrwa ban ai kam ai jam ia ki.