Viskit Meghalaya 2032: Ka thong ban wanrah ia ka roi ia ki paidbah ka jylla

U Myntri Rangbah ka Jylla u Conrad K Sangma ula ban jur ba ka jingkiew ka ioh ka kot ka dei ban wanrah ia ka jingkylla ha ki jylla bad ka thain lammihngi. Ia kane ula kren ha ka jingialang ki Myntri Rangbah jong ki Jylla ka thain lammihngi ba la pyunlong da NITI Aayog dang shen. U Conrad haba kren halor ka jingthmu ka Meghalaya ban pynurlong ia ka thong jong ka Viskit Meghalaya hapoh u 2032 ula ong, ba ka jingkiew ka ioh ka kot ka dei ban wanrah ia roi ka par ia ki paidbah ka jylla.

Ula kren halor ka bynta ki project ba la bei tyngka na shabar ri (Externally Aided Project) ia ki jingtei ba kongsan bad ki la shim ka bynta ba kongsan ban pynkha ia ki jingdon jingem bad ruh ban pyntyllun ki kam pynroi ha ka jylla. U Conrad Sangma ula pynpaw ba donkam ka jingiatreilang hapdeng ki Jylla ka thaiñ Shatei Lammihngi ha ka khaii ka pateng ban shalan ia ki mar shabar ri bad ban pynneh ia ka mariang. Ula bynrap ba donkam ki polisi treikam kyrpang katkum ka jinglong jingman jong ka thain, namar ki jaka ki iapher ha ka thain Shatei Lammihngi bad ka jingim ki briew.

Ha katei ka jingialang ki Myntri Rangbah ka thaiñ Shatei Lam Mihngi la donlang u Myntri Rangbah ka Arunachal u Pema Khandu, u Myntri Rangbah ka Assam u Himanta Biswa Sarma, u Myntri Rangbah ka Mizoram u Lalduhoma, u Myntri Rangbah ka Nagaland u Neiphiu Rio bad kiwei kiba la pynsngew ia ki jingeh bad ki jingdonkam. Ka jingialang ka la iakren halor ki kam pynroi bad ki buit treikam thymmai bad ki jingeh ba ki nongrep ki iakynduh, ka koit ka khiah, ka pule puthi bad ban kyntiew ia ka kam jngohkai pyrthei.