Ka MATI ka pynkhlain ia ka sap synshar ka pule puthi: DP Wahlang

Ka Meghalaya Administrative Training Institute (MATI) ka la pynlong ia ka ‘1st Annual Conference’ halor ka phang “Ki Jingpyrkhat” ha ka 12 tarik Jylliew, 2026 ha Vivanta, Shillong ha kaba u bah DP Wahlang, IAS (Retd.) Chairman ka Meghalaya State Food Commission ula long kum u kongsan.

Haba ai jingkren u bah DP Wahlang ula ong, ki paidbah ki dei ban long kiba lehkhuid ban ioh ka jingkoit jingkhiah bad bynrap ki prokram ai jinghikai ki dei ban pynleit jingmut ban pynsuk ia ki rukom synshar bad pynbha ia ka jingtreikam ba ia dei bad ka sorkar.

Ula pynpaw ka bynta ba kongsan ka MATI ka leh ban pynkhlain ia ki sap synshar bad kyntiew ia ka jingpule ba bteng hapdeng ki nongtrei Sorkar ha kylleng ka Jylla.

U la bynrap ba donkam ban pynneh ia ka jinglong kaba koit ba khiah hapdeng ka kam bad ka jingim ha ka jingshakri paidbah. “Nga la iohi ka jingsynshar ha ki kam shnong ha ka jingtbit bad jinglong ryntih, hynrei donkam ruh ka jingbha jingmiat bad ka roi,” bynrap bad pynshlur ia ki heh sorkar ban iai bteng ban pyniadei bad ban pynneh ia ka jinglong ha ka jingiadei bad ka jingim shimet bad kumjuh ia ki paidah.

U la ong ka jingdonkam ban sdang noh ïa ka MATI Tura Centre ban pyndap ïa ki jingdonkam jinghikai ki heh Sorkar na ka thaiñ Garo Hills ka jylla da kaba pyrkhat bha ïa ka jingjngai bad ka jingeh ha ka liang ka jingkit jingbah.

Ha ka jingialang u bah D.P. U Bah Wahlang ula pyllait paidbah ïa ka Annual Training Calendar bad ïa ka Capacity Building Plan (CBP) jong ki 47 tylli ki tnad treikam ka Sorkar Meghalaya hapoh ki jingthmu jong ka Mission Karmayogi jong ka Sorkar India.

Ula plie ruh ia ka Digital Locker Facility ka jingthmu ba la wanrah da ka MATI na ka bynta ban buh digital bad ban ioh ia ki syrnot pyndep jong ki nongshah hikai.

Ha kane ka sngi la ioh ka jingkren na ka Chandralekha Mukherjee, Principal Adviser, ka Capacity Building Commission ka sorkar India, kaba la pynpaw ia ka jingkordor ka Mission Karmayogi bad ka rynsan iGOT ban pynkylla dur ia ka ri ha ka roi ka par. Ka la khublei ïa ka Meghalaya kum ka nonglamkhmat ban pyntreikam ïa ki jingthmu ka Mission Karmayogi, khamtam ki Jylla ka thaiñ Shatei Lammihngi bad ka la ai khublei ïa ki jingpyrshang ba radbah ka MATI ban kyntiew ïa ka jingpule digital ba ïaid beit bad ka jinghikai.

Ha ka prokram la ïoh jingkren na u Director General ka MATI, uba la pynkynmaw ïa ka jingthmu ka Institute ba ka MATI kan long ka slem hikai.