Ka thain Lammihngi ka kyrdop ia ka India ba pyniasoh bad ki Ri South East Asia: Sonowal

U Myntri ka tnat Ministry Ports, Shipping bad Waterways ka Sorkar Pdeng u Sarbananda Sonowal ula ong, ka Meghalaya ka la paw mynta kum ka jaka wan kynshew kam ba hakhmat hapoh ka thain Shatei Lam Mihngi (North East), haba shim ia ki jingkylla ka thain na ki jingeh ha ki lad pyniasoh sha ka jaka ba kiew ka ioh ka kot, kum kawei na ki khana jingjop ba heh duh ha ka roi ka par hapoh ka jingialam u Myntri Rangbah Duh Narendra Modi.Haba kren hapoh ka North-East India Infrastructure Summit and Exhibition 2026 ha Shillong, u Sonowal ula ong, ka jingkiew shakhmat ka Meghalaya ha ka jingdon ki jingtei, ki kam jngohkai, ki lad pyniasoh digital bad ki jingpynkylla ha ka synshar khadar ka la buh ia ka Jylla kum ka nuksa ba hakhmat jong ka jingkylla ha ka ioh ka kot hapoh ka thain Shatei Lam Mihngi.“Ka Meghalaya ka la pyndonkam hok ia ka spah mariang ba ka don, ki lad ban sengkam sengkam bad ka jingdon ha ka jaka ba biang tam ka ban khring ia ki nongwan shangkai, Information Technology, ka logistice, ka rep ka riang bad ka jingpynmih ia ka bording ka bym lah ban pynlut” la ong u Sonowal.

Haba kren halor ki mat jingpynkylla jong ka Jylla, u Sonowal ula pynpaw ba ka Meghalaya ka la ioh ia ka kyrdan ba lai hapoh ka Ri halor ka Compliance Reduction bad Deregulation 1.0 hadien ba ka pyndep ia baroh 23 tylli ki jingpynkylla kiba hakhmat eh.Ula ai nam ia ki prokram ka Jylla kum ka Cherry Blossom Festival, ka jingpynbun ki jingtei bad ka jingialam jong u Myntri Rangbah Conrad K Sangma halor ka jingpynkhlain ia ka Jylla kum ka jaka seng kam.U Myntri ula ong ba ka thain Shatei Lam Mihngi ka la mad ia ka jingkylla ka bym pat ju jia koit ha kine ki shiphew snem ba la leit noh lyngba ki jingbei pisa ba heh ha ka liang ki surok, lynti rel, kad liengsuin, ki kor digital bad kiwei kiwei.Katkum ka jingong u Sonowal, ka jingkyrshan mang tyngka na ka bynta ka thain Shatei Lam Mihngi ka la kiew sha T.1.08 lak klur ha u 2025-26 na ka T.20,000 klur ha u snem 2014, katba ka jingpynlut baroh ha ka thain ka la tam ia ka T.7.3 lak klur hapdeng kine ki snem. Ula ong ba jan kumba 10,000 km ki National Highway lah dep ban tei ha kylleng ka thain naduh u snem 2014, katba ka jingdon ki kad liengsuin kiba la treikam, ka la kiew na ka khyndai sha ka khathynriew. Ka jingpyniasoh mobile network ka la poi sha kumba 96% ki shnong ha ka thain Shatei Lam Mihngi, ha kaba palat 40,000 tylli ki Shnong ki la iasoh ka 4G service.

Haba shim ia ka thain Shatei Lam Mihngi kum ka khyrdop ba kongsan bha hapoh ka Act East Policy ka ri India, u Sonowal ula ong ba ka thain ka long ka lynti pynpoi mar bad ka khaii ka pateng kaba iasoh bad ki ri ka South Asia bad South East Asia.“Ka thain Shatei Lam Mihngi kam dei shuh ka thain ka shah kerkut sawdong. Ka la kylla long ka lynti pynpoi mar ha ka khaii pateng bad ka khyrdop pyniasoh hapdeng ka India bad ki ri ba marjam bad ka Southeast Asia” ula ong.Kum u Myntri ka Ministry of Ports, Shipping and Waterways, u Sonowal ula iathuh ia ki jingpyrshang ba dang iaid ban pynlong ia ka Brahmaputra bad ki wah ba don ha Barak Valley kum ki lynti iaid shalan mar napoh Um. U iathuh ba ki project ba shongdor palat ia ka T.1,170 klur ki la don mynta hapdeng ka jingpyntreikam ban pynkhlain ia ka khaii ka pateng jong ka thain bad ki ri ka pyrthei lyngba ka duriaw.U Myntri ula kdew ruh ia ki jingkynshew kam kiba heh ha ka jingseng karkhana, kynthup ka karkhana Tata Semiconductor ba T.27,000 klur ha Jagiroad, Assam, kum ka sakhi ia ka jinglong jingman jong ka thain shatei lammihngi kaba nangkiew ha ka ioh ka kot. “Ka thain Shatei Lam Mihngi kam dei ka khappud ba khadduh ka ri India. Ka dei ka khyrdop ka ri India sha Southeast Asia bad ka Indo-Pacific” ong u Sonowal. Hadien kane, u Sonowal ula pyniaid ia ka jingialang CEO Roundtable ba la iashim bynta da ki nongialam jong ki kompani ba ia dei na ki kam pynmih mar kum ka dewbilat, renewable energy, steel, hospitality, logistic bad kiwei kiwei bad la iakren ruh ia ki lad sengkam hapoh ka thain Shatei Lam Mihngi.