Ym don dak mong ha ka met ki ar ngut lait ka dien tyllai phasi

U Superintendent of Police (SP) East Khasi Hills u Bah Vivek Syiem ula ong, ba kim shym lap dien mong ha ka met ki shijur ba suba phasi ha ka step 15 tarik ha Lumsohphoh, Shillong. Lah ban kdew ha ka step 14 tarik ki paidbah ki la lap ia ka metiap ki shijur ba la tip kyrteng ka Pronome Hajong 22 snem na Balat, East Khasi Hills bad u Simanta Hajong 21 snem na Ranikor, South West Khasi Hills na kawei ka dukan die ‘wai dong.

Haba kren sha ki lad pathai khubor u Bah Vivek, ula iathuh ka jingtohkit nyngkong ka kdew ba kine ki shijur ki phasi ia lade namar ym shym la don dak mong ha ka met jong ki, lait noh ka dien tyllai ha u ryndang. “Ym shym la lap ia ki dak jingmynsaw, ka kynhun Forensic ka don ha katei ka jaka bad ka la bishar bniah ban lap ia ka daw jong ka jingiap, haduh mynta ki dak ki shin ki pynpaw ba ki phasi hi, hynrei ngin sa pynthikna hadien ba la ioh ka kaiphod Post Mortem” la ong u SP.

U SP ula kubur ba ki shijur ki don ka jingiadei namar baroh ar ngut ki trei ha kajuh ka jaka. “Ngi dang pynlong ia ka jingtohkit kaei kaba la pynlong ia ki ban shim ia kane ka sienjam” ula ong. Haba kylli hato don ka jingpyrshah ia ka jingiadei jong ki u SP ula ong, “Ym don ei ei kum kata ba ki kmie ki kpa ki pyrshah baroh ar ngut ki dei na kajuh ka jaidbynriew ka juh ka District, ym don jingpyrshah na ki kmie ki kpa bad ka jingtohkit ka dang iaid shakhmat”.