U Pynshngain Kurbah banyngkong eh ban ioh shithi thungkam na ka Sports Policy

Ka sorkar Meghalaya ha ka sngi Hatmajai ka la aiti ia ka shithi thungkam kaba nyngkong eh, ba la pyntreikam hapoh ka Meghalaya Outstanding Sportsperson Direct Appointment Policy sha u nongjop ha ka jingiakob king lieng (Canoe) u Pynshngain Kurbah ha ka prokram jong ka Meghalaya Sports Conclave 2026 kaba ka long ha nongbah Shillong hynne ka sngi. U samla Kurbah, u la ioh ia kane ka shithi thungkam hadien ba u la ioh khur takma rnong na ka bynta ka Meghalaya ha ka 38th National Games, ban kyllalong u nongialehkai sport ba nyngkong eh ban ioh ia kum kane ka jingmyntoi na kane ka policy, ba la mynjur da ka sorkar ha u bnai Rymphang mynta u snem.U myntri rangbah ka jylla u Conrad K. Sangma u la aiti ia kane ka shithi thungkam ha ka jingdon ryngkat u myntri ba khmih ia ka tnad ialehkai ha ka jylla, ka Sports and Youth Affairs u bah Wailadmiki Shylla bad kiwei ki kynrem ki lyndan.

Haba ai jingkren u myntri rangbah ka jylla u la ong ba kane ka shithi thungkam ka dei ka sienjam kaba kyrpang ha ka jingpyrshang jong ka sorkar ban kyrshan ia ki nongialehkai sport, hynrei u la banjur pat ba ka kabu thungkam marwei kan ym lah ban pynlong ia ka sport kaba jop.”U dei u ba nyngkong eh uba iohpdiang ia ka shithi thungkam ba la thung katkum ka policy jong ngi. Hynrei kane kam dei tang ka shithi thungkam marwei kaba lah ban ialam ia ngi sha ka jingioh khur takma ne ban pynjam ia ka sports shakhmat shaphrang,” ong u Sangma. U la bynrap ba kane ka policy ka pynpaw ia ka jingkut jingmut jong ka sorkar ban thaw ia ki lad ki kabu na ka bynta ki samla ialehkai sports bad ban kyntiew ia ka sports ecosystem ha ka jylla.

Ka jingthmu jong ka Meghalaya Outstanding Sportsperson Direct Appointment Policy ka long ban ai khusnam sha ki nongialehkai sports kiba ioh khur ka jingjop, bad ban pynshlur ia ki nongialehkai sports ba kin pynlong ia ka jingialehkai kum kawei na ki lawei ka jong ki.