“Kyrshan ka sorkar ia 7 hajar ki kaitor ban iatem ha surok”

“Ka jingkiew ka Jylla ha ki kam ialehkai ka dei ka thong ban kyntiew bad ban tei ia ka lawei ki samla ym tang ban ia beh ban ioh khur takma” la ong Myntri Rangbah ka Jylla Conrad K Sangma hynne ka sngi

Ia kane u Myntri Rangbah ula kren ha ka jingialang Meghalaya Sports Conclave bad pynpaw ka jingthmu ban pynbeit thymmai ia lade bad ban ialam sha kata ka thong bad ka jingiohi jngai ha kine ki 15 snem ban wan”.

Haba buh ia ki samla ha ka jaka ba kongsan eh jong ka Policy, u Myntri Rangbah ula ong “Na kiba bun ki jingeh ba ngi la iohi bad ki kabu kiba mih na kine ki jingeh, ngi sngewthuh ba ki samla ka Jylla jong ngi ki don hapdeng eh bad ka mynsiem jong kaei kaba ngi kwah ban kynjoh bad kaei ka dei ka lynti iaid ba sdang jong ngi ha ki kam ialehkai. Baroh ngi kwah takma, ngi angnud ban iohi ba ngi jop takma ha ki lympung ialehkai-kane kadei ka jingthmu kaba khatduh eh”.

Ula banjur ba ka jingthmu ba kham heh ka long ban pynlong ia ki kam ialehkai kum ka rukom im bad ban pynthikna ba ki jingialehkai ki iarap ban pynwandur ia ka lawei bad pynwandur ia ka jinglong jong uwei pa uwei u samla ka Jylla.

Ula pynpaw ba hapoh ka CM Meghalaya Grassroot programme, 7000 ngut ki kaitor ki la ioh ia ka jingkyrshan na ka Sorkar ban kin iatem ha ki surok/lynti iaid, jaka jngohkai, jaka bam, kumta ki la ioh ban leh ia kaei kaba ki sngewtynnad eh ban leh bad ki da ioh da ka jingsiew.

Ula ong, ba ka pule puthi ka dang iai long ka jingeh hynrei ula ong pat ba ka Sorkar suki pa suki kala iaid ha ka lynti kaba dei ha kaba yn sa iohi ia ki jingkylla ha ka pule puthi bad ula pynpaw ba 18 lak ki dei kiba hapoh 20 snem ka rta kaba mut 50% na ki nongshong shnong kidei kiba hapoh ka rta ba 20 snem.

“Phin sa lyngngoh ban tip ba ka Meghalaya kadei kaba don bun eh ki GenAlpha-kumta ngi don ia ka jingdon paid kum ki pyramid ha kaba kiba bun eh ki nongshongshnong ki dei ki Gen Beta bad GenAlpha bad sa wan ki GenZ. Nga pan map GenZ, phi dei kiba duna paid mynta hapoh ka Jylla Meghalaya”.

Halor ka jingthmu ban pynlong ia ka National Games, u Conrad ula ong, “Mynta ia ka Jylla kum ka Meghalaya ban phohsniew ha kaban pynlong kat ia ka National Games kadei ka jingjop ia ngi” bad ka pynshai ba kane ka lympung kam dei tang kawei ka lympung, ka dei shibynta jong ka projek kaba la pynkhreh bad bala pyrkhat bha ban jam shaphrang.

Ha kane ka jingialang la ioh ruh ia ka jingkren na uMyntri ka kam ialehkai ka Jylla u Bah Wailadmiki Shylla, ki heh ophisar sorkar bad kiwei kiwei.