Hadien ka jingjurip u MLA, na ka T.553 sha ka T. 770 klur kiew ka jingshna dam

U MLA ka Mawryngkneng Constituency, bah Heaving Stone Kharpran, ryngkat ki engineer ka tnad PHE, ki la hiar ban jngoh da la ki khmat ia ka jingpyntrei kaba dang shaid shaid ia ka dam um ha ka shnong Nonghali.

Kane ka dam um ka dei kaba shna lyngba ka New Shillong Township Water Supply Scheme kaban ai jingmyntoi sha palat 75 hajar ngut ki nongshong shnong ha New Shillong bad ia kane ka dam, ki surok, ki jaka sam um, la buh thong ban pyndep noh ha u snem 2027.

Haba kren sha ki lad pathai khubor, u MLA u la ong ba na ka por sha ka por u ju kren ha kaba iadei bad kane ka dam ha iingdorbar, bad lyngba kane ka Water Supply Scheme, palat 30 tylli ki shnong kin ioh jingmyntoi.

La iathuh ba ia kane ka project la pynshna da ka M/s BAC Infratech Private Limited kaba dei ka kompeni na Hyderabad bad la kyntu ia ki engineer ba kin pyndep ia ka jingtreikam katkum ka por ba la buh khamtam ia ka surok kaba jngai kumba 3 kilometer kaban poi haduh kane ka dam bad watla ka kam ka suki ban pyntrei, hynrei kyrmen ba yn lah ban pyndep katkum ka por ba la buh.

U MLA u la iathuh ba ka jingjylliew ka long 29 meter, ka jinglynter ka long 165 km bad katkum ka jingmang tyngka (sanction) ba la ioh, la pynkiew noh ia ka mang tyngka na ka 553 klur sha ka 770 klur.

U MLA u la banjur ba nangne shakhmat, ym dei shuh ban pynkylla ia ka jaka jong ki project namar kan ktah ia ka pla tyngka jong ka sorkar.