Kwah ka Meghalaya ban ker sainar shiah na ‘Zero Point’ ha khappud Indo-Bangla

U Symbud Myntri Rangbah ba khmih ia ka tnat kam pohiing (Police) u Bah Prestone Tynsong ula pyntip ba ka Sorkar jylla ka la iakren bad ka Sorkar India ban ker sainar shah naduh u line jong u pud u sam (Zero Point) hapdeng ka Meghalaya bad Bangladesh.

Haba kren shaki lad pathai khubor u Bah Prestone ula ong ba dang shen ula lum ka jingialang ban iakren halor ka jingker sainar shah ha ki thain khappud bad ha ka jingshisha ki paidbah ka Jylla kim pyrshah satia ia ka jingker sainar shah namar ki sngewthuh ba ka jingker sainar ka long kaba donkam bha.

“Hynrei haba pyniaid shakhmat ban ker sainar shah kaei kaba la jia ka long kum ka nuksa khyndiat tylli ki shnong kum ha ka shnong Lyngkhong bad don pat katto katne ki shnong ha Raid Nongskhen ha kaba ka shnong ka hap shabar u line jong u pud u sam (Zero Point) hapdeng ka Meghalaya bad Bangladesh.

U Bah Prestone ula iathuh ruh ba don ki khep ba ki jaka rep ruh ki hap shabar u line jong u pud u sam (Zero Point) hapdeng ka Meghalaya bad Bangladesh.

“Kumta mynta ngi la iakren shaphang ka mat bad ka Sorkar India ban kyntu ba lada lah, ban sngewbha ban leit kham shapoh jong u Zero Line khnang ba ka jaka kaba ngi don bad kaba ngi dang pyndonkam ne pyndonkam na ka bynta ki kam rep kan nym hap shabar u line jong u pud u sam (Zero Point) hapdeng ka Meghalaya bad Bangladesh” ula ong.

Haba kylli u Bah Prestone ula ong “Hoid ia kane ka mat ngin sa nang iakren biang bad ka Sorkar India” ula ong.